Office入面總有一班女仔，經常三五成群去到邊都要痴埋一齊，返工約埋落Canteen買早餐，食Lunch一齊排隊叮飯，放工都要打晒眼色夾埋時間執袋走。柴娃娃成日嘻嘻哈哈的確為Office帶嚟生氣，對較為含蓄嘅小熊都係好事，有佢地搞下氣氛，心情都輕鬆啲。
曾經有好幾位同事做咗一段時間，掃把鼓勵佢地去考吓升職位，不過個個都請食檸檬，講明自己留守喺而家嘅職位就足夠。掃把好清楚佢地嘅工作期望和能力，明顯唔係想升職上位嘅發奮上進型，志不在此，但求有糧出又有班啱Key嘅姊妹過下日辰。所以佢地唔會係委以重任嘅目標，一般都係俾啲手板眼見，少出錯嘅工夫佢地做。當然有同級同事投訴可以咁樣Request做少啲，自己就晚晚O.T.壓力大到爆晒瘡！理性上係要公平，但係掃把經驗老到心水清，無心機做出嚟嘅野只會係令佢要不停翻手做或者改到燥，為咗平息同事嘅怨氣，就多啲安排班女仔去做活動Helper做歡樂小姐，而其他同事唔使被Nominate出Function有得專心喺位做自己Core duties，咁對大家都有好處。
喺重要關頭，呢班平時圍威喂嘅女仔一定變咗驚弓之鳥。試過有大粒佬睇咗公司E貓講嚟緊嘅大型頒獎活動嘅Rundown後，親自走過來想嚟討論一吓俾啲意見，我地個妹妹同事一見到佢未知乜水都好有禮貌打招呼。之但係當人地表明自己係Admin General Manger身份和來意時，平時好多野講嘅佢，呢一刻竟然完全不懂應付，只懂傻笑，連最簡單Drop低問題嘅步驟都無做到，只係表現驚恐咁用眼神四圍求救。
經理見狀立即衝上前招架咗先，而事後當然對妹妹待客反應不滿，「Lily，個頒獎禮你都有份去幫手，應該大概知個Rundown係點，GM問返每個部門大合照想延長啲同埋幾時會通知得獎者Rehearsal，你點答人？」Lily被佢一問都心知不妙，呈上一副無辜嘴臉，「我……唔係好知，唔好意思。」經理停咗幾秒，應該係將平時好多毒舌嘅說話都吞晒落肚，因為一班圍威喂嘅妹妹可怕起上嚟，以多人嘅優勢落力向所有識得嘅人唱衰你，就算身家清白，始終人言可畏，嘅然妹妹唔打算學好亦無需要多嘴去責怪佢，所以好簡單咁留低一句，「嗯，下次有相同情況，就盡快搵其他同事幫手先啦！」，就走了。
其實唔知也不是罪過，不過作為HR，最好認得晒最高級嗰幾位大粒佬個樣，離遠見到通知定自己老闆，費事有咩得失待慢。講得遠啲，HR好多時都代表著企業形象，喺正經事上面表現得唔成熟唔專業，係會失好多分的。除非你已經去到快退休嘅年紀，否則都唔好咁快自我停止學習，獨立處事唔淨止講喺職場上，喺生活裡面係一種Sense一種習慣嚟。
圖：Shutterstock
以上文章刊於《招職》。
