片刻嘅寧靜，令人嚮往；但係長時間嘅沉寂，會觸發強烈嘅不安感。
星期一難得被隔離組嘅同事邀約食飯，一行出公司大門，大家把口就自自然放監啦！吱吱喳喳講唔停，喺樓上嘅時候，只係得的的搭搭嘅打字聲同隆隆嘅影印機聲覆蓋整個辦公室，後生嘅一輩心底裡清楚知道多餘說話唔能夠多講，講咩隔牆有耳，根本一班老油條光明正大喺你周圍不停出現收風，將你講嘅一一記住，有咩得罪隨時變成將來評核見紅嘅原因。
其實好奇點解隔離組嘅同事會主動搵我食飯，因為雖然大家都係人事部，但係呢度工作係非常獨立運作，極少需要同其他組嘅同事合作。我第一時間係到佢地係為咗將來係可以收多啲風，此外仲有咩原因呢？
原來係我太小人之心。「阿熊，你初嚟報到，會唔會好唔慣呢？不過都唔怕嘅，你嗰邊嘅同事同掃把好厲害，其中兩個座底有廿年經驗，瑰寶嚟架！」；「阿熊，我地呢邊就多後生仔，大家傾得埋啲，你多唔多帶飯架？有時可以一齊約出嚟食飯吹下水，唔係日日屈喺上面唔講野會口臭架。」佢地一心只係怕我跟著老前輩嘅風格，每分每秒要保持正經認真工作會又辛苦又悶，所以主動拉返我入「八、九十後谷」！
我嗰組嘅同事同掃把，都係一份工由頭做到尾。喺呢個年代同佢地合作其實衍生唔少問題。我由私人公司跳去公營機構，第一個感覺係腳步放慢咗、生活平衡咗，同私人時間多咗。不過喺工作上我著實領教唔少「恃老賣老」嘅情況，佢話一你唔可以話二，吓吓拋自己多年嘅經驗出嚟作為標準。你唔好懶醒比新諗法，只要聽話就得，喺適當時間識做就足夠。最好講少句野，正經野請Email，私人事少講為妙，乖乖地咁你做好晒野準時收工唔會理你。由於制度嘅玩法係睇年資升人，喺似乎無競爭嘅環境下，呢批老前輩諗法就演變成咁。
如果，沉默係道理，係咪應該要開始學識靜靜封嘴工作，上班等下班，再等上班？
圖：Shutterstock
以上文章刊於《招職》。
