係職場打滾咗幾年，喺一間公司入面已經習慣晒所有人嘅步伐同埋工作上嘅種種要求，就會愈嚟愈苦悶，慢慢開始同一班睇住呢個部門變化嘅同事一樣，經常期待有新同事加入，改變一下寂靜又難捱嘅返工時間。
每每有新人嚟到，我地都會好自然地去揣測佢將來會演變成為我地身邊一個點樣嘅同事，又會被牽扯到邊個黨派裡面。職場如戰場，識得謙卑一啲各就各位係基本戰略。有番咁上下年資嘅同事好清楚自己嘅角色同埋喺呢個崗位可以走到幾遠，而幾乎只有一次機會去明示比其他人知道，究竟你係想向上發展，定係保守地留喺原位。下定咗決心就已成定案，好難再大幅度改變老闆對你嘅睇法。既然都唔會再有咩新鮮事發生喺自己身上，當然有新同事嚟嘅時候就開定幾包脆口花生，自己懶懶閒退一步去觀察其他人喺職場生涯一路走一路喺每個十字路口點樣掙扎！
新人永遠唔明白點解做得耐嘅員工比起佢地更苦惱，明明有份穩定嘅工作同收入，照道理生活都已經上晒軌道，但係依然係苦瓜乾咁嘅口面？
生活上嘅枯燥係主要原因，真係開始有番啲年紀就有更深刻嘅體會。人大咗就逼迫自己要理性，雖然大家都清楚香港失業率低，東家唔打咪打西家，但係面子形象係向上流其中好重要嘅關鍵。要喺老闆心目中覺得自己有貢獻又有潛力，喺同事眼中要有少少真我唔偽善，喺伴侶和小朋友面前建立威嚴而親切，咁先係被吹噓喺社會中應有嘅成功態度。講白少少，所有嘅事都係為咗討好和滿足別人嘅期望，一早已埋沒咗屬於個人嘅身份。工作上受氣唔講得，朋友之間有拗撬唔發得脾氣，錢唔夠使更加唔比得人知！特別懷念喺讀書時期，隨便就喺朋友面前將所有牢騷發晒出嚟，就算本身問題未得到解決，呻完已經夠晒痛快！
喺職場入面，身邊每一位每日都有著好多唔同嘅盤算，一陣陣嘅苦澀味似乎喺大家臉上點都抹唔走。老土啲咁講，工作真係唔係生活嘅全部。近呢幾年見得太多負面嘅新聞，因為沉重嘅壓力消化唔到，有人輕生，有人家庭破碎，有人精神失常，見到類近嘅標題已經唔想再心酸地睇落去。呢個社會已多次響起警號，提醒我地唔可以將呢啲惡夢一代傳一代咁落去，要減淡職場上無奈嘅苦澀味，就要留返時間比自己抖抖氣，直到有一日可以真正覺得其實無咩大不了嘅事情！
生活依然係充滿著趣味，就算係搾乾休息嘅時間都希望你去搵返出嚟！
以上文章刊於《招職》。
