喺辦公室裡面，個個把口都話鍾意啲人夠真，不過喺職場嚟講，絕對係大忌！大家雙眼都係銳利嘅鏡頭，你每一個小動作每一個微表情，係其他人嘅目光裡面好可能分析緊你係咪一個值得去靠近嘅「朋友」。
你慢慢就會發覺，其實一個二個都係好介意公司嘅人點睇自己，要扮得自然係好考功夫。每日有咁多時間喺Office，要忍足全日保持微笑和禮儀，你堅持到一個星期，都頂唔到一個月啦！特別係女士每月嗰幾日，生理和心理真係需要特別照顧，皮膚可能變差咗，性情突然容易變得暴躁。如果可以有一個小小嘅私人時間去調整一下自己，唱首歌做陣GYM咩都好，總之有個位可以發下癲發洩下，先可以似番個人架嘛！可惜呢啲機會不是我的。Office hour唔喺位做野，老闆實嘈嘈閉話電話無人聽點算？E貓遲咗覆邊個負責？作死麼？所以，匿喺洗手間頹一陣，又要表現到若無其事喺狹窄嘅座位度默默做！
營營役役嘅長工時入面，千祈唔好為咗令自己感覺舒服啲，就肆無忌憚去表現真性情，以為只要同平日嘅生活處於同一態度，慢慢會練成喺Office都可以輕鬆應對任何事嘅心境。其中一種易出事嘅係有啲同事好刻意和非常落足心機去佈置座位，好多老闆會覺得個位太花碌碌又多玩野嘅，即係代表唔專心工作。我地有位好迷戀粉紅色物品嘅女同事就將佢個座位裝飾得好Lady，除咗喺屋企帶晒粉紅色嘅公仔和扭蛋返嚟放滿枱頭外，仲有常用嘅水煲、抹手巾、飯盒和文具，無一樣唔係同色嘅。由於散發出嚟嘅浪漫少女氣息太強烈，女同事行過會八八卦卦「參觀」又有咩新玩意買咗返嚟配襯，而男同事行過就會尷尷尬尬快速閃走。最搞笑就係，連比老闆簽名嘅File封面都係粉紅色，如果你唔係做創意行業嘅話，喺平常嘅Office，太過突出只會成為大家飯餘講笑嘅話題，呢種從一而終嘅喜好真係唔太適用喺工作上。
想工作間成為你嘅私人天地，做野唔想咁大壓力，小熊點會唔理解，只係出得嚟行，預咗要謹慎避免好多麻煩。其實小小嘅私人時間唔係話完全無，低調啲就無問題。好多同事踏入三字頭後都寧舍注意健康，日日都帶一兩壺私伙養生飲品或者湯水返嚟，女士更加係必備披肩、眼藥水、保濕噴霧和潤手霜。每日花啲時間去享受自己呢啲小小心意，雖然好短暫，但已足夠提醒自己係比沒完沒了嘅工作重要。辦公室係唔存在私人空間，所有野都係公家，即使喺你個座位，你個身份，只係暫借比你，同租樓一樣，你幾守本份都唔一定會安坐到老。打工仔可以無野心但一定要有警覺性，唔好咁傻喺返工時硬要擠出丁點嘅私人空間去令自己好過，倒不如搏下表現捱埋到收工，之後真正去玩餐飽啦！
圖：Shutterstock
以上文章刊於《招職》。
