香港打工仔，一日廿四個鐘，有差唔多一半時間要喺公司渡過，全日用盡個腦嘅精力，誇張啲講，只有去茅廁嗰幾分鐘先係最自由舒暢。如果你公司洗手間裝修得靚仔啲，分分鐘日日去廁所都要排長龍。因此，公司嘅洗手間，亦可以被稱之為休息聖殿，係打工仔每日小休嘅神聖地方。不過，偏偏喺呢個咁莊嚴嘅聖殿，總會有啲冇公德心嘅人使用不當，影響其他人最自由舒暢嘅幾分鐘，使用時必須遵守以下使用指南。
保持清潔及渠道暢通
雖然辦公室一個洗手間可能最多都係供幾十人使用，但一兩個人冇公德心就會影響全村人。洗手間清潔最重要，但總有人唔顧及其他人感受，唔知係咪太趕時間趕住出去做嘢，廁紙會隨處掉、瞄準目標唔係太準確，結果擊中錯誤嘅位置。有啲打工仔唔知係咪做嘢壓力太大，要利用洗手間發洩，每日都以用廁紙塞滿座廁為目標。當有需要嘅人行到入去，見到唯一一格可用嘅座廁塞滿咗廁紙，其實感覺真係好沮喪。你真係估唔到呢班平時斯斯文文嘅同事，原來有咁冇公德心嘅人存在。而最後辛苦咗嘅，永遠係幫手清理嘅清潔姐姐，請問於心何忍呢？
保護公物
又唔知係咪因爲壓力嘅問題，為咗一陣出去可以繼續保持笑容對住老細，嚟到洗手間呢個發洩嘅好地方，有人就決定要大肆破壞一番。我就見過甩咗出嚟嘅廁所板、被破壞嘅門鎖、再裝唔到廁紙嘅廁紙架⋯⋯好明顯係被人暴力對待過。洗手間嘅物品都係公物，破壞咗對大家都冇好處，我明嘅，全部都係老細嘅錯，有事慢慢講，洗手間是無辜的，放低卷廁紙先講啦。
保持寧靜
有啲同事鍾意一班人一齊約埋去廁所，可能因為熱鬧啲，仲可以喺洗手間嚟個小聚會。隔住廁格、夾雜住令人尷尬嘅聲音吹水可能特別舒暢。另外，仲會有啲盡責嘅同事，喺洗手間傾公事傾到忘曬形，甚至嚟一場洗手間外交。呢個時候發現TBB啲劇其實都幾寫實，是非總要喺廁所講，然後畀廁格入面啲人聽到。始終洗手間都係公眾地方，畀人靜靜地解決大小事就夠，唔駛講咁多是非畀人聽。
注意使用時間
就著喺聖殿要處理嘅事情，每個人使用聖殿嘅時間都有所不同係可以理解嘅，之不過，有啲人嘅使用時間就比較唔合理。眾所週知，聖殿嘅格數通常都比較有限，但每次總有一兩格被人長時間佔用。裡面有時會傳出Candy Crush 嘅配樂、有時會傳出whatsapp嘅打字聲、有時甚至會出現鼻鼾聲⋯⋯
其實打工仔做到眼瞓都係人之常情，因為唔想畀老細見到自己恰眼訓，所以唯有避走洗手間。雖然你可以容忍到洗手間嘅氣味而瞓得著，在下實咗十分佩服，不過長時間佔用一格嚟訓覺，係會影響到真正有需要嘅人。
