根據2016年瑞銀一項研究指出，香港人工時係全球之冠，平均一星期做足50個鐘，全球第一好威威。工時最短嘅係巴黎，每週做30小時，同香港相差成20個鐘，就連附近出咗名工時長嘅東京，都係做39個鐘，同香港都相差成11個鐘。
其實一星期做50個鐘對香港人嚟講是常識吧，朝九晚六已經9個鐘，一日OT一個鐘已經係賺咗，7點收到工返屋企睇到《賭城群英會》已經要謝主隆恩。唔講唔覺，原來我地一直以嚟覺得好合理嘅工作時間原來對於全人類嚟講係咁長。
香港人生活壓力大，供樓畀家用，每日為咗賺多啲，爭取工作表現難免會OT。再加上歷史遺留落嚟嘅職場文化，認為OT等於勤力，老細未走、同事未走，拎起個袋走，感覺似逃走。OT已經成為香港人嘅壞習慣，其實有冇諗過，比起工作，生活上仲有好多理由值得我地拎起個袋，昂首闊步咁收工。
為咗重要嘅人
我地好多人努力工作，無非都係為咗畀到更好嘅生活身邊嘅人。但往往工作就犧牲咗我地陪屋企人嘅時間，忽略最親嘅人。你試想下今日你做多個鐘，同屋企人相處嘅時間就少一個鐘。你可能覺得每日陪少一陣唔係好多，但久而久之，你投資喺屋企嘅時間愈少，同屋企人嘅關係就更疏離，當家庭出問題嘅時候已經後悔都嚟唔切。當初我地明明係想令家庭幸福，但結果往往不似預期。當你發現好耐冇花時間喺重要嘅人身上，例如好耐冇同屋企人同枱食飯，喺未算太遲之前，係時候諗諗點樣放低工作，早啲收工陪下屋企人。
為咗自己身體
「冇咗健康，搵幾多錢都冇用。」我諗呢個道理大家都會好認同，不過做起上嚟就好困難。當大家埋首工作，就好容易辛苦不知時日過，眨下眼就到六點，然後發現好多嘢都未做。因為工作，好多香港人攪到食飯唔定時，冇時間做運動，仲因爲返工壓力成日發惡夢。試下問下自己，幾耐冇做運動？近一個星期有冇發惡夢？如果有，係時候要畀自己抖抖，做下運動發返個好夢。
為咗做開心嘅事
每日喺公司奔波勞碌，畀老細捽到來回地獄又折返，好快就唔記得咗開心嘅感覺。做自己開心嘅事一啲都唔難，可以係收工去睇《變形金剛》，可以係返屋企煲劇、可以係打機買figure、可以係煮餐飯畀自己食。做開心嘅事係人嘅本能，只怕你冇畀時間去做。如果你好耐冇做過令自己開心嘅事，不如今日早啲收工畀自己開心下。
今時今日嘅打工仔，特別係80、90後，越嚟越重視工作生活平衡，工時、OT文化、公司工作生活平衡嘅政策，成為咗吸引新一代加入嘅重點。不過睇返香港人嘅工作時間，對於香港公司嚟講，睇嚟仲有好長嘅路要走。
