一聽到要開會，有人喊三聲，有人面都青。喺會議室入面，我地成日都會見到好多種唔同類型嘅人，佢地各有各特色、各自各精彩，梗有一種你見過。
1. 長氣袋
喺會議室入面，令人覺得最恐怖嘅可能就係呢種。佢地講嘢唔係冇point，而係佢講個point之前會有冗長嘅前奏。由佢開口講嘢到聽到個重點，可能已經消耗咗大家寶貴嘅十分鐘，少啲耐性你都可能被激死。如果佢喺你下屬，你都可以提醒佢講重點，不過如果你老細喺長氣袋，只能夠祝你開會愉快。
2. 開會無謂人
同Steve Jobs共事過嘅Ken Segall就曾經喺佢嘅著作裡面分享過，Steve Jobs開會唔鍾意太多唔關事嘅人坐喺度，與會嘅人愈少愈好。我地開會成日有機會見到啲唔關事嘅人坐喺度，佢地就喺所謂嘅「開會無謂人」。佢地嘅特色係一個「靜」字，有時你甚至察覺唔到佢地嘅存在。不過佢地嘅存在有時並唔係佢嘅錯，佢可能都係被逼坐喺度。如果你都有做過「開會無謂人」，你就會明白佢地嘅感受。其實佢地都好痛苦，明明事不關己，但都要坐足幾粒鐘，自己冇嘢要負責之餘，出面仲有堆積如山嘅工作要處理。有時，公司嘅工作效率就係因為咁樣被影響。
3. PowerPoint之鬼
有一種人開會前一定會準備一個製作精美嘅PowerPoint，裡面每一個bulletpoint、轉slide都有動畫，插圖都一定係精挑細選，好難想像佢到底花咗幾多時間去整個PowerPoint。有時聽眾甚至掛住欣賞佢個PowerPoint，聽唔到佢講啲乜。 Steve Jobs除咗唔鍾意太多人開會之外，佢亦都唔鍾意人地開會用PowerPoint，因為佢希望團隊討論同思考，認為知道自己要講咩嘅人唔需要PowerPoint嘅輔助。無獨有偶，Amazon創辦人Jeff Bezos同樣禁止員工開會使用PowerPoint，因為佢認為口述會比冰冷嘅PowerPoint令人感覺更好。哈佛大學最近都做咗個研究，結果顯示，有用PowerPoint同淨係用把口present嘅效果原來冇乜分別。雖然今時今日PowerPoint變得刻板老土，但仍然有人醉心製作精美嘅PowerPoint 。聽過有老細甚至要求員工將資訊填滿每一張slide，唔得到PowerPoint之鬼嘅稱號誓不擺休，不過有時可能根本比唔上口述咁有吸引力。
4. 點頭公仔
如果你有揸車，你車上面可能會有個點頭公仔。喺會議室入面，你同樣可以見到點頭公仔嘅出現。當每位同事發言嘅時候，佢個頭就好似有聲控功能一樣一直點，好似表示緊認同、十分專心，而且個頭好似永遠唔會攰。有啲更加先進嘅仲有語音識別功能，聽到特定人士嘅聲音會有特別嘅反應。例如聽到老細講嘢，佢個頭會點得特別起勁，老細一停，佢就會停。當問到佢有咩意見，佢就會點頭和應別人嘅見解。雖然開會表現得好專心，但係當你開完會問返佢聽咗啲咩，佢可能完全答你唔到，下次你都係叫佢返出去做嘢好過喇。
