愈來愈多人心思思想投身成為「斜槓族」( Slash )，不過殘酷現實係Slash族貧富懸殊情況較全職市場有過之而無不及。唔想成為「寒底」Slash族，「落水」前就要好好衡量這10個條件。
1. 至少有二技之長
Slash族最基本定義係同時做緊幾份工，假如你只有一技之長，而這一技又只適合全職工作，咁你就較難啟動Slash生涯。所以想「落水」成為Slash族，最好諗辦法加多一項謀生技能，例如你正職係做會計，把握公餘時間用心鑽研近年大熱的夏威夷小結他Ukulele，咁就可以多一瓣教授Ukulele工作，增加「多工」本錢。
想成為Slash族，最好具備兩項或更多謀生技能。
2. 捱得
有啲人投身Slash族後收入大減，通常關鍵原因係懶。因為由全職變為多份散工╱兼職，稍為懶就很容易縱容自己動輒唔返工或有心情先做嘢，咁就注定收入暴跌。所以殘酷的現實係搵到錢的Slash族必定勤力又捱得，有需要時直踩12小時都不以為苦。唔想後悔，最好有心理準備要把「捱得值」加倍催谷才加入Slash族。
3. EQ要高
打一份全職工，你面對的只係同一堆同事及上司。但轉做Slash族同時打幾份工，你就係要同幾堆同事及上司相處。如果你係接Job做，就日日都要與唔同的客仔相處，少一點EQ都日子難捱。如果你現在撈全職，EQ度已瀕臨Hang機狀況，想成為Slash族就要好好提升EQ了。
4. 應急基金
不論是創業加打散工，又或純粹做幾份兼職模式，你的收入都未必像過往做全職長工般穩定。而且轉做散工，你亦會失去公司提供的醫療福利，只要你睇一次醫生，就會發現由幾十元診金爆升為五百元診金的財務壓力。因此最好參考理財專家的建議，預先儲定一筆相當於三個月人工的應急基金，當有需要時都不用慌忙「撲水」周轉。
做Slash族同時打幾份工，應付唔同客戶嘅唔同要求，所以EQ一定要高。
5. 盡量減債
同樣道理，如果揹住成身卡數，轉型為收入不穩定的Slash族，財務狀況就會更凶險。所以投身Slash族前，你應該好好利用份全職工收入穩定優勢，盡快清掉卡數或貸款，回復財務自由身。
6. 建立核心收入
Slash族大忌係收入不穩定，基本生活開支就成為難題。應對此風險，最好辦法係先建立一個基本的核心收入，例如其中一份兼職係長做長有及準時出糧，幫自己生活開支打定底，就可以放心開拓其他收入來源。
7. 唔怕煩
做Slash族，純粹打工的話，你一日都要兼顧幾份工，忙起上嚟安排時間都幾花精神。如果你係接Job加打散工，煩的程度就倍增。為方便接Job，最好就開間公司，開公司涉及的商業登記，還有最難搞的公司戶口，對打慣工的人來講，煩的程度都算係十級。Slash族另一關於煩的考驗係計數，不論是打幾份工，又或接Job加打工，由於有幾筆收入，你少不免要每月埋一埋數計算收支，當然每年報稅亦較以往只有全職收入煩得多，所以有心想做Slash族，必須克服怕煩心理。
Slash族必須懂得處理好自己的財務狀況及收入管理。
8. 有紀律
憧憬Slash族生活最大的誤會係工作時間夠自由。無疑相對全職工作，你未必需要日日準時九點前到達公司，但接Job或打散工，你同樣都要準時到達工作崗位，而且因為兼顧幾份工，你的工作日程表會更複雜。從這角度看，Slash族其實較全職工作更講求紀律。如果你想成為Slash族，便應該由今日起好好提升自己的工作紀律。
9. 能屈能伸
不少人投身Slash族後，其中最大的感受係原來昔日做全職工作有更大空間去揀Job。皆因你平日做得嘢，如果老細都算有商有量，遇到好難做或真心唔想做的項目，都可以提出理由婉拒或要求同事幫手。Slash族牌面上可以自由揀Job，但遇上市道唔多好，又或你擅長的工作競爭激烈，其實就無乜揀Job空間，你成日踢Job的話，對家只會另請高明，而你就會白白放棄賺錢機會。
做得Slash族，有時要面對現實，唔容許揀Job做。
10. 懂得靈活轉身
做Slash族另一能屈能伸條件係隨時可以做全職工作，強如有投資者注資的Start-up，小老闆因為講明唔收人工，自己都要去打工賺錢養家。Slash族亦如是，遇到有薪酬吸引又適合自己的短期工或合約工時，千萬不要死守只打散工原則，賺定一筆，既可以幫補旅行，用來作儲備，之後大半年工作亦可以輕鬆啲，何樂而不為？
文：Peter Cheung
