飛行航班有冇得揀？
大家都知道，航班有分長途同埋短途，到底係點分配給一眾空服員呢？最常見係每個月有一至兩班長途，再搭過夜機或者即日來回機；地點嚟講公司講法係隨機安排，基本每個月夾埋有70至80個鐘。做呢行最爽就係，可以按個人需要同其他空服交換航班，有小朋友嘅空姐想多啲照顧家庭，就會唔想飛長途，盡量換短途；亦有人住得遠，想減少來回公司次數，想飛多啲長途。亦有人係從來唔飛某啲地方，或者櫻花季節特登揀去日本、以前去巴黎買手袋走水貨 ( 依家無得退稅就少咗 ) 等等，確係自由到不得了。
返工有咩做？使唔使幫客搬行李？
當然啦，返工唔係齋旅行，真係要做嘢架，比起一般服務性行業都會忙啲。開工第一件事，就係登入系統後，通過Safety question，入面會有受訓時學過嘅安全知識，要答啱先可以返工。之後就入房由機艙服務經理 ( ISM ) 同我哋Briefing，講吓今日有咩特別乘客，例如病人、要帶備醫療器材、大肚婆或嬰兒，以致係出晒名嘅麻煩客人等。另外都會提醒目的地有咩要注意，假設去美國唔可以帶水果、生肉，我哋要知道，先可以提點搭客。另外有同事經常服務某啲航線，都可以分享心得，例如印度客鍾意飲威士忌，日本客鍾意帶生果上機，等其他人多啲留意。之後再分部門細講，講完就搭公司車去機場。
空服要早過乘客45分鐘上機預備，包括雪凍飲品、擺放報紙同埋收拾一陣要用嘅嘢，之後就要睇吓滅火器、氧氣樽呢啲救命嘢有無問題，以及做保安檢查，搵吓機上有無收埋可疑物品。等到搭客上機喇，就要留意有無人病或者飲醉，安排搭客放行李等。不過記住，空服係唔會主動幫手擺行李，因為唔計工傷，除非老弱傷殘先會出手。
起飛後又要忙一大輪，長途機通常先出飲品，再派餐。最厭惡性係洗廁所，萬一有人屙到成地都係，或者嘔呀、爆血之類，都要我地清理，要睇好唔好彩遇到。如果班機唔爆，可以鎖咗廁所就算，但爆晒或者長途機就焗住清潔。
橫蠻無理乘客點應付？
以上講嘅嘢，基本上每次返工都一樣，有人會話唔駛點帶腦返工。但有時都要鬥智、考EQ，遇上惡客要點樣笑住回應呢？最常見係貪小便宜，例如知道點投訴就可以升級經濟艙，或者R賠償等；我地都係跟足規矩咁做，儘量滿足客人要求，但機上無資源都無計。最重要係呢班機話事人，即係ISM點決定，如果佢寧願寫report都要企硬，呢啲惡客就唔會得逞。
有單嘢係，個客一上機話花生敏感，但佢買機票個時無講明，而空服即場問佢時，竟然自稱無帶藥，淨係話附近有人食花生自己會死，所以空服估佢想要求升級。由於佢嘅說詞好流利，所以應該唔係第一次咁做，可能之前過到骨就食過翻尋味。呢次嘅空服就話唔會幫坐佢周圍嘅乘客派花生，亦話佢知經濟艙都有人食花生，不過客人堅持要升去經濟艙。呢個時候，空服就話請佢落機，怕佢有生命危險，個客即刻就話無事。遇到呢啲事係嘔血嘅，惟有睇自己或同事、上司點應變喇。
人工點樣計？
大學畢業生應該會覺得人工只係一般；以一間本地最大航空公司為例，每個鐘108元，基本人工係70小時人工，即係7,560元，飛唔夠70小時都係呢個價錢。當然飛多過就以時數嚟計，如果跟公司更表就每個月70至80小時，若然肯拚搏嘅，可以同其他人交換長程航班，聽過有人一個月飛120小時，已經好厲害。
雖然呢份工係多勞多得，但有好多限制，因為民航處規定空服去完五日長途機，短途機要最少放1日假，所以唔可以每日返工。由於人工唔算高，如果要養家就會做多啲。另外街外人都知我哋有外站津貼，即係要去其他地方過夜或逗留幾日，公司就會比使費，慳啲用錢就可以儲起，都算係收入之一。假設要去美國留48小時，公司會當你食六餐，有啲航空公司用酒店餐廳嘅價錢嚟計每餐畀幾多錢，仲有其他費用如洗衫等都會比埋。公司可能比當地現金，亦有過數，有時多嘅每個月就萬幾蚊，少就得幾千蚊，主要睇更表好唔好。美國咁遠梗係好，但菲律賓、印尼呢啲短途又當地生活水平低，就無咁多津貼。
我應唔應該試呢份工？
剛入職時，啲同事可能會問你幾時走，因為覺得讀咁多書，唔會滿足於無得升職嘅環境，玩完就會離開；而且做空服好辛苦，工作時間長，體力透支，而且腰、手、腳係勞損重災區，因為餐車好重。仲有經常有時差，起身時唔知自己喺邊係常有嘅事。對好多人來講，好難捱。
另一方面，對大學畢業生來講人工唔算高，剛入職平均一個月萬七、萬八，十年前已經係咁，上年只加1%人工，追唔到通脹，餓唔死但唔會發達，同埋人工去到某個位置就無得升。睇落好無前途，亦磨滅意志。所以好多人話，呢份工係靠夢想撐起，唔入職永遠唔知有幾惡劣。
但係呢，仲有好多人係唔捨得走，做足十幾年，一來返工時間係比打工仔正好多，唔需要日日返，假期多，好多人做慣咗已經返唔到朝九晚五。另外航空公司有好多條線，久唔久開新航線，所以空服成日有新鮮感，保持到對工作嘅熱情。有時候想去英國或澳洲買嘢，同其他同事交換更期就得，比一般人慳好多機票、酒店錢。同埋公司會有旅遊同埋醫療津貼，屋企人有一折機票，做夠一年後每年仔女或配偶都可以享用免費票 ( Free Of Charge, FOC )，都筍架。
由於工作需要，空服每日要照顧幾百人，每人有唔同需要，可以話幾刺激，經常有新挑戰，而且訓練待人接物成熟啲，唔會悶。人事關係亦唔駛煩，因為公司多人，每班機只須十幾人服務，同其他同事相遇嘅機會較低，就算同某同事唔夾，飛完今次就算，唔駛日對夜對。相反，如果有好Friend嘅同事，可以調更表一齊飛，落地後成班一齊吃喝玩樂，而且公司提供嘅酒店通常質素唔錯，幾舒服，成件事係開心嘅。
對年輕人來講，做空服員係可以增廣見聞嘅，能夠周圍去玩，而且假期多，所以有人會唔捨得走，咁嘅生活好正；雖然人工唔高但亦都夠生活，或者有啲空姐嫁咗有人養亦無咩所謂。又或者努力工作搏快啲升職都得嘅。當然啦，做咗三五七年先走，出去只能搵客戶服務工作，所以入行時要諗清楚事業規劃，若然只想體驗吓，玩夠就要開始搵工喇，知無？
延伸閱讀：做空姐空少 享受自由人生
文：Suki Wong
