就快又到農歷新年，攞完Bonus（如果你有）又係搵工嘅好時候。「近年市道好差」、「出面個市好靜」呢啲說話我諗大家呢幾年都聽到厭，所以上年年尾有好多忍咗兩三年唔轉工嘅朋友，都開始問「今年係咪轉工嘅好年」。雖然我唔太識風水命理，但如果而家間公司唔能夠滿足到你「Career Path嘅需要」的話，咁今年就係轉工年。
考慮「人工」同「職位」係重要，但唔係主要
你可能會問乜野叫做「Career Path嘅需要」，當然人人嘅情況有異，職場初哥同老手想得到嘅野亦好唔同，但大多數人都會將所有嘅工作目標放咗喺「人工」同「職位」之上，尤其有好多剛剛踏入職場嘅初哥，認為畢業後只要入到一間大公司，人工高就代表一切，不過咁樣就好易會忽略咗好多更重要嘅事情，最後可能變成「贏在起跑，輸在終點」。
其實大部人嘅職業生涯都好相似，都會經歷幾個差唔多嘅階段，由最初嘅「摸索期」、到之後「儲經驗」、再「儲年資」、跟住上「神枱」，唔好以為上咗神枱就完，跟住又要再次進入「摸索期」、再「儲經驗」等等，如是者循環幾次。有時可能因為你發現工作唔太適合自己而轉行，所以開始另一個新循環；又或者有時可能係因為你升咗上神枱之後，開始接觸到全新嘅事物，所以需要再摸索、再儲經驗。
一個好上司重要過搵一間大公司
其實剛剛出嚟工作頭幾年，係第一個「摸索期」，需要嘅並唔係一份人工高、福利好嘅工作，亦唔一定要入一間跨國企業，你哋真正需要嘅係一個較闊嘅學習機會，所以一個有豐富工作經驗、教到你野嘅上司係十分之重要。呢個上司唔一定要好叻，但最好係紅褲子出身，咁樣先能夠真正幫你打好基礎。見過好多剛出嚟做野嘅朋友，為咗要多一千幾百蚊嘅人工，而放棄咗跟一個好上司學習嘅機會，最後雖然人工高，但將來一轉工時，乜都係半桶水，最後辛苦都係你自己。
之後工作再多幾年，「學習」已經七七八八，開始要「儲經驗」，有發揮空間嘅工作機會先係呢個階段最重要嘅事情，其次就係要慢慢學習如何做management，為下一個階段作準備。呢個時候紅褲子出身嘅上司未必夠，仲要有一定嘅視野，能夠帶你「看世界」，而唔係只「看工作」。佢能夠帶同事望到更遠嘅事情，亦有世界嘅視野。跟住呢啲上司，如果你feel到佢有「C-Level （chief executive level) 嘅氣質」，咁呢個就係你要搵嘅人，但可惜嘅係，呢啲上司真係可遇不可求。如果呢個時候喺一間大公司內工作，又遇到呢類好上司，人工低少少、甚至可能係減薪轉工，都係值得。只要你捱過呢一段時間，用你嘅經驗加埋呢間大公司嘅名氣，下一份工嘅人工就可以跳幾級。
再過一段時間，做咗人阿頭，開始要「儲年資」，同時又再等下一個機會、排隊上「神枱」，呢段時間好難再有人去教你野，上司係點已經唔太重要，而學習management嘅事情都係靠自己居多，所以呢個時候一間好嘅公司先係重點。
搵個好上司，有時係重要過搵間好公司，雖然好多時上司都係冇得揀，但如果喺你現時嘅工作階段，呢位上司唔能夠幫你繼續向前行，咁就要快啲將佢由「上司」，變佢做「前上司」。
