Claim錢呢個動作，做得最多嘅當然係Sales們，但嗰啲經常出差或者對外工作的打工仔，都成日要返公司Claim錢。既然係幫自己追公司攞返啲錢，於是每個月尾就好勤力咁執好晒啲單據計清楚啲數，然後Send去會計等攞錢，但係有時啲單多起上嚟其實又真係幾煩及幾容易出錯，一旦計錯數，往往被啲會計同事彈返轉頭不突止，眼光及語氣仲好似當你係有心呃公司錢咁，真係好容易同佢地開拖！
核對單據上面嘅時間、日期、地點及工作事項等，係正常嘅，但係有啲超級盡責嘅會計，甚至會偵探上身，誓要喺全部單據裏面搵到你「企圖呃公司」的蛛絲馬跡！咁當然如果係機票酒店呢啲項目就好正常要Check，但係一啲例如八達通增值車錢補貼佢哋都會睇埋，而且會失驚無神問我點解要去嗰個地方增值。都痴線嘅，公司明明預先批咗比同事啲車費限額架嘛，我哋都係攞張單返嚟出返數啫，唔係連增值地點喺邊度都會有問題嘛？
對於經常要返內地出差嘅人，好多時單據上面嘅資料會製造更加多嘅麻煩！而家喺大陸，Call車方便過截的士，但問題就係呢一啲叫車服務係冇單據嘅。聰明嘅司機會預先安排一啲路費嘅單據比我哋返公司Claim錢，但真係要睇清楚，因為有時嗰啲單係唔啱日期架，有時甚至即使係的士發出嘅收據，上面嘅日期都會錯！
就係咁我試過瀨嘢！因為其中一張的士單嘅日期出錯，令到我出現咗同一日喺兩個不同城市同時出現的士單，最後又係被會計同老細話我呃錢！「都唔Make sense嘅，有乜理由一個人同一時間可以喺兩個唔同嘅城市出差呢？」
我認為呢啲會計都唔經大腦嘅，呢啲根本係小問題，唔通員工會因為嗰幾十蚊呃公司錢咩！其實如果搵得夠，邊個想咁煩，為咗要Claim返嗰幾十蚊，嘥埋啲時間坐响度，逐條數同公司計呢？！
