阿頭神色凝重細細聲咁吩咐我︰「幫我Gen某部門新同事嘅Leave report出嚟睇下，Urgent啊！」通常做得呢個行動都唔係好事，絕大原因係同事放得太多唔合理嘅假；特別係未過試用期請假，好少人敢放Sick leave或者拎Advanced annual leave嘅。
我望一望個Report，呢位同事入職咗三個月，半日半日咁總共拎咗兩日Annual leave，又唔算過份，話晒Annual leave係扣自己嘅假。
真係咁巧合，被查嘅同事Angela走嚟我位搵我，低住頭一臉愁容問我︰「阿熊，唔好意思啊，有啲事想請教一下你。」佢由面試、比Offer簽約、入職，一直係我一手一腳跟進，所以順理成章有關人事上面嘅事佢會慣性問我。「唔好咁講，有咩可以幫到你？你無事嗎？好似唔係好舒服咁嘅？」
苦瓜乾嘅佢聽完更苦，「係咁嘅，我爸爸昨晚過咗身 …… 我 …… 想問呢 …… 未過Probation有無得請恩恤假？」心裡面一酸，「當然有啦，節哀順變 …… 你有無事啊？不如同你上司講聲請日假抖抖啦！」憂心忡忡嘅佢輕按額頭，勉強地表現冷靜︰「其實我好頭痛，今朝同上司講咗想請一日Sick leave，但係佢話太多野做最好唔好再放假 …… 之前我爸爸情況危急，所以我咪問過你點請Advanced假嚟陪下佢。我上司唔信我家人有事，黑晒面咁架喇。」
佢作為一個副經理，竟然忍唔住口話比我知佢受嘅氣，證明難受到咗一個位。而我，作為一個人事部嘅同事，當然唔可以數算佢上司壞話，雖然一早聽聞佢嘅女上司係好冷漠嘅工作狂。我只可以盡量建議佢先為自己打算較好，「你同佢講咗呢件事先，等佢有心理準備你遲下需要請恩恤假，同埋 …… 你真係辛苦嘅，放日假休息啦，自己身體最緊要。」
佢有禮貌連聲客氣地講「唔該」就話返去做野，我思緒未轉得切，就被阿頭召 喚！「喂，阿熊，啱啱Doris姐比咗個Email我地，『科』咗比你睇，而家Angela個Probation暫定會Extend。拿 …… 唔好透露比任何人知啊！」心裡即時爆咗句︰「吓？咩話？」經理級咁易要Extend，我地呢度Probation已經要六個月咁耐，講得Extend應該係好不滿工作表現先會做得出。想像下個同事知道後嘅感受，我估佢可能覺得不如炒咗自己算啦！點講得自己打份工要試用九個月 …… 甚至一年！
難道Doris姐期望Angela會似方進新喺《大時代》講︰ 「老闆 …… 比次機會啊 ……」咁樣哀求？
我唔了解Angela嘅工作情況，唯一知道嘅係佢放咗個兩日Advanced annual leave用咗嚟作為Extend嘅其中一個考慮因素，事實證明佢無向Doris姐講大話，家人的確有事並且已離開，如果咁樣合理放假就喺印象上扣分，好唔抵。一間出色嘅公司或機構最重要嘅係員工素質，得個做字嘅工作狂好快到Limit，識體諒同發掘同事優點嘅上司先可以繼續No limit咁進步落去。真心希望Doris姐會改變心意啦！
以上文章刊於《招職》。
