政治如是，辦公室如是，循規蹈矩嘅人都比較難上位。
大家有一樣嘅青春本錢，當喺職場上選擇咗行一條咩路，建立咗相對嘅形象，就好難改變人地對自己嘅睇法。一個「好打得」嘅老實型打工仔，係咪所有老闆都鍾意呢？如果你係做Supporting嘅就一定好搶手，唔需要你識得點樣變通，乖乖地準時做晒佢嘅柯打，令佢無後顧之憂就得架啦。係嘅，工作上佢會好依賴你，因為你處理得頭頭是道又信得過，只要俾少少甜頭或者假希望你，就可以自動Extend多一段時間有你繼續仆心仆命為公司，煩惱減半。
不過久而久之，老闆就知道按部就班嘅人原來深信要升職就要儲年資排隊，而要儲年資就唔會離開現職嘅公司。其實有人擔保過公司一定會跟著你諗嘅故事線去發展劇情嗎？呢個年代好少呢支歌仔唱架啦，你一直等升，老闆無任何動作，咁都唔出去搵，只係你無勇氣而搵藉口。如果被佢發現你咁「好使好用」仲唔有風駛盡，變得貪得無厭？首先將你嘅Workload愈加愈多試你底線，要你做埋隔離Team阿A阿B阿C嘅工作。表面上話比你學多啲，實情就係誘導你產生一個願景以為Take up得更多責任就肯肯定升職在望啦！
唔只咁，之後當老闆有難時，佢就會考你願唔願意為佢挺身而出。即係咩？即係孭鑊啊！都係受少少委屈啫，就可以令老闆保持完美討好嘅形象。嗱，大家心知肚明，做咗有機會成為心腹，唔做呢就自求多福！對於細細個就被教導為要遵從命令嘅人嚟講，要落呢個決定真係十級痛苦。
而「精甩尾」嘅人點解好多時輕易扶搖直上呢？佢地真係可以做到老闆無咗佢地唔得？小伙子你太年輕了，人地係背後出招唔通講你知。勤力工作就一定無佢地份，不過識Social哄得老闆開心，去咩場合都帶住佢地就真嘅。原本被睇唔起嘅佢地不知不覺就成為咗掌握實權，毫無懼色咁對你工作上指點嘅人。職場上就係咁，識得應對唔同性格嘅人就愈容易成功。而對循規蹈矩嘅人致命嘅弱點就係，即使唔甘心眼白白被人捷足先登，依然放慢手腳只係識喺度靜觀其變。係因為怕，怕萬一完全脫離咗自己嘅慣性，就兩頭唔到岸，守唔住堅持多年嘅功績。
入職得愈耐，就愈早被人定型。老闆係同時需要唔同類型嘅下屬去幫佢嘅，佢心知懂得守規矩嘅人係好重要，只係一遇到有趣又可塑性強嘅員工就會立即被吸引過去，都係人之常情。唔好抱著一個敵對嘅心態去應付，你都想上位，就要係「適當時候」Show下你嘅功力！表現番你嘅OT係無白費嘅，除咗熟悉晒公務嘅運作，公司政策，仲有建立到嘅人脈呢？合作開嘅部門、對家公司對你嘅好評呢？呢啲都係強而有力嘅證明去Prove到你有能力再上，喺公司做咗好野最緊要被人知！
如果行到呢一步都無結果，老闆依然覺得循規蹈矩嘅人做得好做得多係理所當然嘅話，年輕嘅你就不如收拾心情，搵更好嘅機會。付出同收穫從來都不成正比，認清咗現實，唔好日日返到公司坐喺個位度鬱鬱不歡。想走一條點嘅路係要自己搵，難上位又如何？自己性格係咁但總會有啱你嘅位置。
圖：Shutterstock
以上文章刊於《招職》。
