平時大家唔聲唔聲喺位工作，表面上差別不大，亦猜唔透心底裡有咩盤算。不過當老闆一有咩工作需要大家幫忙時，會係雞飛狗走定係蜂擁而至呢？各自嘅反應就係最睇到大家性格嘅Moment！
最常見就係公司有Function要出人，小薯一定避無可避，Super作狀問你有無興趣去，實情係就算你Say no到最後都係叫你出席，有時唔想扣印象分，十次有八次會被自願地Say yes，而講之際都可能忍唔住黑一黑臉，或者好冷淡對答，暗示一下不滿。不過，只要轉換一下角色，詢問嘅對象係部門主管嘅話，原本死沉沉等被點名嘅氛圍，立即變成主動舉手參與嘅歡悅場面。好現實？無錯，喺職場大家會在衡量利益後，有著數就梗係爭先恐後去突出自己，哪怕只係搏得同部門主管一次嘅同場機會，你慢一拍諗多一秒可能就將好運送咗俾人地。特別係公營機構工作，有啲重要部門少則數百人，真係無咩幾可見到尊貴嘅老闆架。
通常反應分三種，一係借咗聾耳陳隻耳，匿喺位專心扮工，咩都聽唔到見唔到，堅持話唔去，之後發生嘅任何事都與自己無關。就算老闆經過你個位，都只會微微點一點頭，然後極速走回自閉的世界一切如常。第二種就係蠢蠢欲動嘅小薯，想發下威但又無勇氣，知道老闆親自落黎宣傳，立即喺Whatsapp group瘋傳消息。嗱，自己一個唔夠膽嘛，咁成班一齊行動就無咁尷尬啦，而且效果出嚟仲懶係團結咁，老闆就最鍾意睇到啲細嘅爭住話要做野，咁勤力一定係Super教導有方啦，各有面子，咁樣一舉幾得幾好啊！
而最厚面皮最經驗老到嘅無錯就係老海鮮啦！一知道老闆會蒲頭，唔會仲考慮去唔去馬咁膚淺架啦，係已經上咗馬諗定幾句美言同埋點樣透露喺呢度嘅貢獻，衝緊埋去啦！喺小薯眼中，佢地可以做到好Over去攞彩，「係呀，今年新增設嘅關心員工身心健康活動係我建議同安排人手嘅，唉啊，我都估唔到反應會咁熱烈，又得到你嘅大力支持，每一項都好多同事報名仲話希望見到你一齊參加一齊黎玩添啊！」我阿頭已急不及待發功，踩住對五吋高踭鞋，緊貼住老闆右手位置邊行邊講，仲不停奉上可鞠的笑容。旁邊嘅同事開始竊竊私語，又嘴藐藐，小熊八卦打聽後就知佢出事啦！一系列嘅活動係由一大班經理辛辛苦苦搵資料開咗N個會傾出嚟，但阿頭太大貪，完全係講到自己一人嘅功勞，而且人手係各部門去分派出黎，根本唔關我阿頭事，今次真係……大鑊了，唔知背後有幾多箭準備向佢發射呢？
查實老闆雖然位高權重，但其實咪又係普通人一個！擦鞋仔多的是，佢見咁多人，一眼就睇得穿你想點啦！只係佢唔想浪費時間喺你身上，你講完一大餐，笑一笑完咗件事就算。要出盡法寶去令佢記得你唔難嘅，不過因為咁而得罪晒身邊嘅工作伙伴又值得咩？小熊就唔想勉強去做皇帝嘅紅人，呢隻老虎唔會真正想去了解你辛勞嘅工作係點，一有小事令佢唔順心，可能第二日你消失咗喺公司都無人關心。如果自己未夠Quali和信心穩守紅人位置，何不謙卑一啲扎好個馬先攀升上去呢？
圖：Shutterstock
以上文章刊於《招職》。
