上回提到：Stella回家跟媽媽飯聚，開始能以平靜的心去面對媽媽的批判。
「食飯啦，冇煮啲乜嘢好餸，唔知啱唔啱妳胃口。」媽媽仍然沒有望過自己一眼，每句話仍然是沒有尾音的。還未及開口回應，媽媽續說：「咁耐都冇返來食飯，係咪又做錯乜嘢事 ⋯⋯」
大約年多前，即Stella搬離家不久，跟拍了五年拖的男朋友分手。當期時分手的原因不是發生了甚麼大事或爭吵，而是有點無聲無色地結束。關係最後的一年，對方曾表示Stella過於着緊他，大小事情都須要跟她匯報，感覺被控制，沒有自由。另一邊廂，Stella表示只是想他多點陪伴，關心自己多一點。然後在大約一個月彼此沒有聯絡下，五年的關係便無疾而終。
表面堅強，但內裏十分軟弱的Stella，於分手後的一個晚上回家；雖然內心沒有期望獲得家人的安慰，但卻意料不到媽媽竟然抱出一句「一定係妳唔知做錯啲乜，人地先會唔再搵妳啦！」那晚的悲痛，仍然烙印在心中。現在聽到「似曾相識」的回應，Stella再也按捺不住：
「點解妳一定要係咁先開心嘅？」猛力放下碗筷，抖音地說：「次次想返嚟食餐飯，最終都係要搞到鬧交收場！」
「關心下妳啫，做乜事要發咁大脾氣呀！就係妳呢種臭脾氣，點會有男人鍾意妳 ⋯⋯」媽媽終於望着Stella，雙眼充滿怒氣。
心隨境轉
「妳咁樣叫做關心？我真係冇見過有阿媽會咁樣關心個女架 ⋯⋯」Stella情緒激動，淚水從雙眼湧出：「如果妳咁樣叫做關心，我寧願妳唔好再關心我。」
「係呀，想有人關心自己最後又得唔到係好慘架，我咁多年都係咁過架啦！」提高了嗓子回應的媽媽，情緒也終於爆發出來。
「我冇關心妳？我每個月都有比家用妳，就算之後要供樓，我都冇比少個一毫子 ⋯⋯ 出面幾多做仔女嘅，搵到錢一蚊都會唔俾返個老豆老母。」
「比咗錢就代表係關心？妳同妳老豆就係咁啦，以為比咗錢就大哂；你地呢啲『關心』，以後留返比自己，唔好講到好偉大咁。」媽媽也激動得淚流滿面。
接下來是一陣子的啜泣聲，然後是長久的靜默。
本來滿懷信心，希望藉着這次飯聚跟媽媽和好的Stella，再沒有說話。起初還以爲自己能做到不被媽媽影響，看到她只是自己的一面鏡子，但原來內心仍然很容易因外境而轉變。接下來該怎樣做？腦裏一片空白的Stella，垂下頭望着餐桌上的飯餸，無言。
（待續）
