最近公司新來Intern ( 實習生 )，第一日返工「例牌菜」，就係同事拉大隊去飲茶，老細請客。席間指定動作係腦細勉勵實習同事一番。
大家有冇發覺，有番咁上下年紀的老闆或企管，好鍾意訓勉後生仔，自詡「塞錢入你袋」。佢地嗰套職場格言有冇料到先不論，最弊係無厘新意，講來講去無非「年輕人唔好怕蝕底」、「最緊要肯學肯捱，好似我地以前咁」、「要投資喺自己身上，進修一定無衰」之類，三豪子一擔維園阿伯都有得出賣。今次腦細又循例扮演人生導師大講做人哲理，之後問起Intern同事以前有冇搵過兼職或暑期工之類。豈知新同事分享了一個智破求職騙局的經歷。
其實故仔也不算怎麼峰迴路轉，劇情熟口熟面。話說實習女同事外貌標緻，身材高䠷，在街上被所謂星探發掘，游說到某模特兒公司見工。
女孩子被氹兩氹，加上好奇心，就依言去試鏡。然後就是典型騙案格局，未有Job做之前，公司要先收一大筆培訓費及造型費。其間一個西裝友不斷向女孩們洗腦：「做呢行，最緊要唔怕蝕底」、「造型費係投資在自己身上，有邊個名模唔係用錢堆出來」、「新入行好多嘢要培訓」……
基本上，這些擺明搵老襯的甜言蜜語和腦細剛才的人生格言毫無分別，聽到腦細面都黑晒。
那麼Intern同學如何識破騙局？原來她的求職宗旨係：我出來打工，係搵錢唔係比錢！加上堅信偶像子華神金句：「靚就唔洗扮，扮就唔慌靚」，她對自己的外觀衣著化妝都好有自信，聽到要比造型費培訓費，即刻搵個藉口逃離現場！
Intern同事用親身經歷來「回應」腦細的「指點」，未免年少氣盛太唔比面 ( 搞到辦公毒男一路聽一路忍笑 )，不過憑她的條件，畢業後根本唔志在我公司有冇Offer，無所謂啦。
計我話，乜嘢職場格言都係假，後生仔搵工最緊要唔好被人呃。得閒睇下勞工處求職陷阱網頁，仲好過聽Old seafood老點啦。
