正所謂「吊頸都要抖下氣」，除咗放工之後，打工仔每日期待嘅另一個時間就係Lunch Time。難得有一個鐘嘅休息時間，唔想同同事Social，又唔想睇Youtube 片浪費時間。不如試下以下幾個方法，好好畀自己休息下，又或者把握機會增值下自己，畀自己Take 個Break，晏晝再努力過！
1. 運動
坐咗半日，坐到頸緊膊痛，食完Lunch 就好應該運動一下。如果公司附近有Gym Room，不妨去做大半個鐘有氧運動，不但可以Keep Fit, 仲可以釋放壓力。
唔想去Gym Room 搞到成身汗，又要沖涼咁煩。你可以係公司做一啲簡單嘅伸展動作，拉下筋，個人都無咁攰。
聳肩﹕呢個動作適合長時間打字嘅人，首先將雙手自然垂低，再將膊頭向上抬起，盡量貼近耳仔方向，保持1、2秒後再放鬆，之後再將膊頭向後方用力，重複8-10次，就可放鬆膊頭。
手臂後推﹕企直、眼望前方，雙手自然垂低，將手心向後，呼氣時，慢慢將手臂向上抬起，吸氣再慢慢放低手臂，有助訓練肱三頭（Bye Bye 肉位置）。
2. 散步
有研究指人每日行一萬步有助健康，但打工仔長時間坐喺Office，放工就即刻返屋企休息，好難建立每日行一萬步嘅習慣。所以應該要好好把握Lunch Time 嘅時間，食完飯就到公司附近嘅海傍、公園等散散步，慢慢行15-30分鐘，吸收一下維他命D，唔單止令你更精神，仲有助維持心臟健康。
3. 閉目入神
好多打工仔食完Lunch之後，都會把握時間趴係位瞓，但一食完嘢就瞓，容易增加腸胃嘅負擔，引致腸胃不適。
如果你真係好攰，可以以閉目入神取代瞓覺。閉目入神時，大腦會減少接收外界訊息，等大腦可以有時間靜落嚟、休息一下，可能比午睡更有效消除大腦嘅疲勞感，而且閉目養神唔會影響到其他器官運作，較有利於消化及腸胃健康。
4. 睇Ted Talks
Lunch 想睇片放鬆下，又想把握時間增值自己，可以睇Ted Talk 嘅片睇吓唔同界別嘅專業人士分享。Ted Talks 嘅主題包羅萬有，包括﹕技術、娛樂和設計。事實上，科學、教育、發展、文化、商業、藝術、環保等，你可以跟據自己嘅興趣揀返啱嘅片睇。而且，Ted Talks 有好多英文短片，而且支援唔同語言嘅字幕，遇到唔識就睇返中文字幕，趁機訓練下自己嘅英語聽力，唔好睇小Lunch Time 得短短一個鐘，每日學小小，英文能力都會大增！
