對於曾經係半個御宅族嘅自己嚟講，就算幾忙都好，今個復活節檔期，好快就入場睇咗<挑戰者一號>，果然不負所望，緊張刺激，好好睇。
完場，八十年代嘅回憶當然返晒嚟，除此之外，作為一個開始踏入職場老油條階段嘅自己，又有另一番感受。
套戲嘅故事大綱，係一位創建者開發咗一個叫OASIS嘅VR遊戲平台，爆機條件就係集齊遊戲內三條鎖匙，而男主角就憑對創建者嘅了解，挑戰成功，取得所有鎖匙爆機。
其實職場都一樣，辦公室就好似OASIS，你要了解明白身處嘅環境，所屬嘅上司，身邊嘅同事，先可以挑戰成功。
而三條鎖匙其實都各有含意。
第一條鎖匙，係賽車場上贏返嚟，當大家都以為賽車一定係向前跑嘅時候，男主角就逆向開車，搵到秘道直達終點。我認為男主角贏呢條鎖匙嘅最大原因，除咗佢夠膽做有違常理嘅決定之外，更重要係男主角係資料館細心聆聽思考創建者每一句說話，化成有用嘅資訊，先可以支持佢倒後開車嘅信念。好多時當自己有一定程度嘅經驗或者ideas，當然會好希望每件工作都可以朝著自己嘅方向走，但亦可能會因為唔明白環境獨有嘅文化，而做得吃力不討好。其實如果重覆太多次都係做唔好嘅時候，不妨放低自己嘅經驗，細心聆聽思考上司或同事每一句說話，化成資訊，或者會搵到新方法，足可以令你嘅工作做得比人更快更暢順。
第二條鎖匙，係代表咗創建者當年無勇氣同女神表白嘅心情，結果錯過咗好多事情。勇敢為自己/職責發聲係好重要，明知啱嘅事而唔做，或者明知係錯嘅事而繼續做，都一樣會令自己痛苦同後悔，最後可能會引至辭職！如果遇到講又死唔講又死嘅兩難嘅情況，不如勇敢地提出正確嘅建議，或者會有正面效果。學子華神話齋，死，最少都要死係自己手上，咁先無悔。
第三條鎖匙，創建者係想表達，打機唔係為贏，打機係為打機！而男主角就係搵到遊戲內嘅秘密空間，取得最後一條鎖匙，成功爆機。呢個概念可能比較抽象，但其實唔難明，用自己嘅經驗為例，我嘅工作係需要睇好多報告同數據，再向上司分析提議嚟緊嘅項目應該點做先最好，如果我只係為答上司問題而從報告搵答案，無錯我係可以交差，但我嘅能力就只會局限係上司嘅思維之內。如果要更受人賞識，應該要好似男主角咁，去發掘遊戲/報告/工作內最有趣之處，做得比別人出色，咁你就會成為一個難以被取代嘅人。唔止為份糧或者上司而工作，為工作而工作，咁你與成功之間又踏出咗一大步。
最後，創建者雖然覺得自己建立咗一個好受人歡迎嘅遊戲平台，但仍然遺憾自己無同心目中嘅女神，兄弟好好溝通，引至失去佢地。
可能寄意我地食lunch嘅時候，離開 FB news feed，IG shop，打少陣機，好好地傾下計，可能咁樣做，你會好似男主角咁得到一條extra life既意外收獲呢。
