Advice Columnist

轉行又驚要由零開始？點算好？

初入職時通常都對份工充滿憧憬，但做兩三年後發現呢個行業唔適合自己，好想轉行，但又驚要由零開始，唔通真係返唔到轉頭？即刻睇下轉行四大注意事項啦！

1經驗始終有用
好多人擔心轉行就要全部嘢都再學過，自己會跟唔上而擔心。但其實有工作經驗嘅你，總有一啲學到嘅知識會再次用得著。例如：你本身係一個Sales，經常要同個客溝通，即使你轉行後做PR，說話技巧同樣重要，你以前嘅溝通經驗就會幫到你！

2.向行內人士了解
為免「重複犯錯」，再揀錯「行」，應該先擴闊社交圈子，與行內人士多加溝通。問多啲朋友呢行嘅內部文化，最好聽埋佢地覺得你有冇做呢行嘅潛質，咁就可以全面睇清楚該行係唔係適合自己！

3. 可以先轉一間新公司
其實好多時候，你覺得而家份工唔啱做，好大機會係現公司嘅工作或者同事唔適合你，唔同公司有唔同客人、團隊處事方法齊亦會有好大分別。所以建議你可以先去另一間公司再試試，真係唔啱再轉行都唔遲。

4. 簡歷要清晰
對於新公司最擔心就係轉行對該行業並冇足夠認識，擔心你唔能夠勝任新工作。所以當你製作簡歷時，要突出以前嘅工作同申請職位嘅關聯，明確指出你能勝任嘅工作，令新公司可以相信你嘅能力，而非「貪得意」就轉行！

CLASSES.com.hk

CLASSES.com.hk 著力搜集生活趣聞趣事，網羅生活小知識，提供各種熱門工作坊活動，釋放每個人潛在的不平凡。

Keep reading

Related career advice

Advice Columnist

【職場指南】未過試用期放紅日被扣糧，公司有冇犯法？一文看清勞工法例點樣講！

打工仔轉新工，最開心當然係撞正農曆新年、復活節或者聖誕節等長假期。不過，唔少新人一出糧就發現：「咦？點解今個月少咗幾百甚至幾千蚊？」問返 HR，原來係因為「未過試用期，紅日放假無糧出」。到底公司因為紅日而扣起月薪員工嘅人工，有冇違反香港《僱傭條例》？直接解答：公司扣薪，其實並無犯法！好多人以為月薪制就等於「包月」，只要係放公眾假期就理所當然有錢收。但原來根據香港勞工法例，公司喺特定情況下，扣除新入職僱員嘅紅日薪金，係合法嘅，並冇犯法！拆解《僱傭條例》：關鍵在於「3 個月」而唔係「試用期」點解公司可以扣糧？根據香港《僱傭條例》，所有僱員（無論做咗幾耐）都有權放法定假日（即係俗稱嘅「勞工假」）。不過，「放假」是一回事，有沒有「假日薪酬」（即係有薪假）又是另一回事。法例明文規定，僱員必須按「連續性合約」（即俗稱嘅 418 規定：連續受僱 4 星期，每星期不少於 18 小時）受僱滿 3 個月，喺緊接法定假日之前，先至有資格享有該日嘅「假日薪酬」。換句話說：注意，勞工法例嘅標準係「3個月年資」，而唔係「試用期長短」！「勞工假」 VS 「銀行假」頭先講嘅係法定假日（勞工假），咁公眾假期（銀行假）又點計？香港法例主要規管法定假日，而額外嘅公眾假期（例如部分復活節日子、佛誕等）則視乎公司政策。對於不屬於法定假日嘅公眾假期，法例並無強制僱主必須支付薪酬，一切以雙方簽訂嘅僱傭合約為準。但慣常做法上，大部分提供銀行假嘅公司，都會將兩者嘅計薪方式統一處理。扣錢點樣扣先啱？如果真係要扣糧，公司都唔可以亂扣。根據法例，假日薪酬嘅每日款額應該等於僱員在該假日前 12 個月內所賺取嘅每日平均工資（ADW）。如果受僱未滿 12 個月，就用入職以嚟嘅較短期間去計算。公司唔可以隨便用「月薪 ÷ 30日」嚟扣錢，必須依照 ADW 嘅準則嚟計先算合法。總括而言，新入職未夠 3 個月被扣紅日人工，喺勞工法例上係沒有違法嘅（除非合約另外寫明「入職即享首三個月有薪法定假期」）。各位求職者喺簽約嗰陣，記得睇清楚僱傭合約條款！有唔少「好老闆」或者大機構，會喺合約列明「入職首天即享有薪公眾假期」，咁就唔洗擔心頭三個月遇到大節日會「糧尾」啦。如果合約冇寫，不妨喺面試或簽約時禮貌地向 HR 問清楚公司嘅假期計薪政策，咁出糧時就唔會有期望落差！

Advice Columnist

【職場求生術】遇上「扮工」專家？教你4招對付成日扮忙嘅同事

喺香港職場，大家一定遇過呢種同事：日日將「好忙啊」、「真係做唔切」掛喺嘴邊，一有新 Task 就即刻卸膊。最令人眼火爆嘅係，佢哋硬係鍾意喺 Weekend 或者半夜三更覆 Email，特登 CC 晒畀班 Management 睇，營造一個「搏命為公司」嘅假象，但實際上工作產出少之又少。面對呢種「扮工」專家，身為同事嘅你難免會覺得委屈，甚至因為佢推卸責任而增加咗自己嘅 Workload。今次為你準備咗以下 4 招應對策略，教你點樣優雅地應對，唔使硬食死貓！ 1. 劃清界線，拒絕無了期「接身後事」 2. 白紙黑字，留低溝通紀錄 3. 唔好做觀眾，冷處理「非辦公時間」嘅表演 4. 專注自己，相信管理層嘅眼光職場上最重要係保護自己嘅 Mental Health。與其為咗「扮工」同事激心，不如將精力放喺提升自己嘅實力上！

Advice Columnist

老細每粒鐘要你「報更」？4招教你對付 Micro-management 控制狂上司！

返工最怕遇到啲咩？唔係無窮無盡嘅 OT，而係遇到一個 Micro-management（微管理）嘅老細！每日每分每秒都 mon 住你，不停問：「你而家做緊咩？」、「份report搞成點？」，最誇張嘅甚至要你每日 mark 實一張 Time sheet，每個鐘「報更」匯報自己做過啲乜。面對呢種令人窒息嘅工作環境，與其日日喺位度反白眼兼懷疑人生，不如試下用以下 4 招「反客為主」，拆解老細嘅不安感！ 1. 主動出擊：先發制人，塞爆佢個 Inbox 控制狂上司之所以不停問，往往係因為佢缺乏安全感，覺得一切唔喺佢掌握之內。既然佢咁想知，你就不如主動匯報！ 2. 善用工具：透明化你嘅工作日程老細要你每個鐘寫 Time sheet？與其嘥時間填表，不如主動提議用更有效率嘅方法。 3. 向上管理：委婉反映「報更」嘅時間成本好多老細未必意識到，不停要求員工匯報，其實係會拖慢工作進度。你要搵個適當嘅時機（例如 One-on-one meeting），平心靜氣咁同佢傾下。 4. 建立信任：用實力證明你係「靠得住」講到尾，Micromanagement 嘅核心問題係「信任」。要老細放手，首先你要證明自己值得被信任。 🌟 終極絕招：三十六計，走為上計！如果你試過晒以上方法，交足貨又主動溝通，但老細依然故我，將控制慾無限放大，搞到你精神緊張、壓力爆煲……咁證明呢間公司嘅文化根本唔適合你。與其留喺度受氣，不如及早轉身！全港咁多好老闆，總有一個懂得欣賞你嘅獨立工作能力！唔好等啦，即刻為自己嘅 career 搵條新出路！