全世界都回復正常嘅時候，唔少打工仔都諗住出門旅行或者已經去咗幾次。搞旅行最忌錢使咗換來一肚氣，唔想咁就要懂得規劃成本及行程。今次講吓點樣衡量旅行的成本。
提起成本大家都會先想到錢，其實放假出門旅行涉及時間、金錢同人情三項成本，忽略任何一項都可能令你這次旅行變得物無所值。
記得放假前唔好留低啲工作手尾比同事跟。
1. 人情成本
先講人情成本，坊間好多請假貼士都會建議打工仔夾紅日拎假，咁就可以輕鬆自製超長假期。這類建議聽起來很精明，但所有同事望一望你請假日的日子，都會明白你的盤算，在人手永遠不足的香港職場，經常動用這一招只會令自己犯眾憎。所以夾紅日放假無話唔得，但切記適可而止，反正唔少公司禁止帶假到明年，就不如年尾用盡年假，總好過為了放多幾日假而激嬲同事。
另一項人情成本係「推Job比人」，職場上對年尾拎假同事最大怨氣，就係明明有重要Project，甚至已到了關鍵時刻該名同事都可以厚着臉皮拎假去旅行。遇着呢類情況，最理想當然係唔好去。但真係想放假，就切記要在放假搞掂重要Project必須完成的部分，以及避開這個Project的關鍵時刻如向大老細及大客匯報進度，外遊時亦要全天候保持「可連繫狀態」，即係WhatsApp、電郵全開，方便同事隨時可以搵到你，這樣才可以把無法償還的「推Job比人」成本風險減至最少。
去旅行若選擇轉機，要計算一共所需的飛行時間，否則假期都花在飛機上。
2. 時間成本
至於時間成本，除非你係「劈炮」去旅行，否則都必須睇住自己拎幾多日假去選擇目的地。基本一步係得五、六日，就盡量避免搭長途機，皆因齋搭飛機都無咗頭尾兩日，去到「實玩」三、四日，行程必定係走馬看花。
還有一項時間成本須留意係轉機，一些平機票看似吸引，但你細看之下原來要轉機，換言之加上轉機時間，即使去日本搭飛機已消耗頭尾兩日。故此面對須要轉機平機票誘惑，最「理智」的方法係看一看轉機的地點，還有轉機後直航的地點。例如想到日本北陸地區賞雪，同時喜歡到台北逛街，選擇台北轉機平機票，既可以到台北快閃玩一轉，又可以從台灣直達北陸富山，省卻搭長途火車之時間及心力。
選擇去匯率低的地方旅遊，花錢都會豪爽啲。
3. 金錢成本
最後亦最重要係金錢成本，借錢去旅行之後再慢慢還，似乎對唔少打工仔來講係可負擔又符合「早玩早享受」理念。但借錢去旅行危險之處，在於借錢唔難還錢難。現時只要你有穩定收入，上網簡單幾個步驟貸款就到手，當你分12期還，但往往你還了半年，又忍不住再借新錢去旅行，於是旅行債就不斷滾存，最終令你成為旅行債苦主。
要避免旅行債陷阱，治本之道就係用自己儲備去旅行，既可以免卻揹上旅行債，另一好處係錢儲得辛苦，你會較審慎地按預算去規劃行程。
金錢成本另一關注點，係留意匯率走勢。選擇目的地時，不妨從匯率角度去考慮，就有把握享受一次更符合性價比的充電旅程。
