打工仔返工最緊要嘅當然係人工! 臨近年尾， 大家最想知嘅一定係下年人工加幅有幾多。香港浸會大學就發表咗一項薪酬調查，結果顯示下年度各職級嘅加幅預測介乎3.5%至3.8%之間! 呢個結果又有無合乎你嘅期望呢?
香港浸會大學工商管理學院人力資源策略及發展研究中心聯同華南理工大學工商管理學院人力資源管理研究中心、香港人才管理協會、廣東省人才開發與管理研究會，以及今年首度合作嘅澳門大學及澳門大灣區人力資源協會，發布「2023粵港澳大灣區薪酬及福利調查」。調查喺今年7月至9月期間進行，針對香港區嘅調查，就訪問咗 87 間香港機構、約6萬8千名僱員。
結果顯示，喺本年度（2022 年 7 月至 2023 年 6 月）有 7 間公司凍薪，剔除呢部份凍薪公司後，整體實際調整加幅介乎3.6% 至 4.3% 之間。而展望2024年，下年嘅加幅同今年相約，各職級嘅整體調整加幅預測介乎3.5%至3.8%之間，同樣有7間預計會凍薪，剔除呢7間公司後，整體調整加幅預測介乎3.8%至4.1%之間。
以下係各職級下年平均薪金調整幅度預測:
管理/經理級員工: 3.5%
中層/主任/專業員工: 3.8%
職員: 3.7%
一綫/基層員工: 3.8%
調查亦了解咗各機構喺做薪金調整時有咩考慮因素，結果反映考慮因素同舊年大致相同。調整員工薪金時最重要嘅考慮因素係「機構整體業績」，其次係「個人表現」。
呢個結果你又滿唔滿意呢? 你估下年自己嘅加薪幅度又係幾多呢? 想知更多呢個調查嘅結果就要留意CPJobs 嘅update 啦!
