聖誕節本應普天同慶，但一不小心在公司Christmas Party抽到中伏禮物，真係喊三聲！唔想踩中地雷？自己首先要避免成為地雷，小編即刻帶大家睇睇揀禮品有咩貼士！
1. Budget最好先有共識
雖然俗語話「講錢傷感情」，但相信冇人會希望用500蚊禮物換份50蚊禮物返來，因此搞Christmas Party前，同事之間最好預先傾好大家應該花費幾多Budget去買禮物。
佳節當前，金額事小，傷感情事大。講到底，交換禮物係求開心，萬一抽到大家一肚氣，就無謂啦！最終無論Budget訂在100定500蚊，甚至是更大金額，購置的禮物夠唔夠「正」、夠唔夠「入屋」，就要睇埋以下幾點了。
2. 揀禮物避免太自我中心
大多數香港人見同事仲見得多過家人，朝見口，晚見面，大時大節梗係加強工作環境良好氣氛的好機會！不過，由細到大，你有冇試過收到唔鍾意的禮物，然後當送禮者問你鍾唔鍾意時，你基於禮貌迫於無奈要答「鍾意……」？
為了盡量避免呢種淒慘情況，買禮物前請謹記：每個人的風格都不盡相同，你喜歡的東西，別人不一定喜歡。揀禮物時，買你覺得好香的香水、Hand Cream與淋浴套裝，或者你覺得好可愛的毛公仔和家居擺設，最後未必正中紅心㗎！
3. 輕輕有啲Personal，反而更氹到同事開心
有些Christmas Party交換禮物會採用Secret Santa方法，送禮人一早就知要買禮物送畀邊個，範圍收窄了，送禮到底係易咗定難咗？咁就要睇你平時有冇留意該位同事，對佢的喜好有幾熟悉喇。話就話送禮切忌太Personal，因為愈Personal就愈高風險，但如果係輕輕帶點個人化的禮物，就唔同講法！
譬如你留意到同事日日都飲咖啡，無「啡」不歡，那麼選購禮物時，不妨考慮咖啡店的現金禮券，同事收到啱用之餘，亦代表你為人細心，會關心同事所需。至於點解唔買手沖咖啡器具或咖啡豆，原因就係：太Personal了！除非你好有信心自己清楚了解同事需要甚麼器具，又或是偏好甚麼口味的咖啡豆，否則就算你幾用心揀禮物都好，同事收到都可能唔啱用。
4. 實用是王道
惡搞路線的禮物雖然有趣，但當Party的玩鬧氣氛過去後，就未必件件都仲吸引；與之相反，落在光譜另一端的，就係主打實用路線的現金禮券。
的而且確，以前有不少人會批評送Coupons同Gift Cards「好悶」、「冇誠意」、「師奶禮物」，但隨著潮流改變，愈來愈店舖推出專屬的禮券，呢樣禮物的吸引力亦漸入佳境。若然公司團隊多、同事多，想諗一樣最有可能個個都喜歡的禮物，各式各樣的現金禮券就最啱心水，而且就算收禮者唔啱用，想轉送別人都唔難。
最實用梗係三巨頭（iTunes、Google play、amazon）的Gift Cards，以及超級市場Coupons；而如果同事年齡層較Young，又或者鍾意打機煲劇，亦可以考慮送出PlayStation、XBOX、Netflix和Steam等切合潮流的Gift Cards。
5. 最忌缺少心意
大部分人都會好開心收到有點奢侈的禮物，即係平日「想要但又唔係好捨得買」嗰種，其次就係「物有所值」的禮物，至少收到一定唔會喊三聲，因此揀禮物要記住以下呢三個「心」：
夠細心，才能注意到同事想要乜；夠貼心，才會花心思包靚啲份禮物；最後係要有同理心，先唔會送出連惡搞都算不上的禮物——冇錯，預祝今年冇人會收到過期六合彩飛！
話說回來，「如何送禮得宜」本身就係一門深奧的學問，秘訣隨時寫到字典咁厚都寫唔晒，不過只要記實以上五大貼士，揀份又正又實用的禮物，其實唔難。
仲未諗到送乜？不如參考吓呢份清單！
「No List」
1. 杯——年年都抽，屋企好多喇！
2. 相架——而家唔係個個都會去曬相㗎喇！
3. 香水、香薰——香味太Personal！
4. 潤手霜——屋企存貨多到2025年都用唔晒！
5. 淋浴套裝、浴鹽、泡泡浴——唔係個個人屋企都有浴缸！
6. 頸巾、手套——人人著衫風格唔同，衣物就唔好送喇！
7. 毛公仔、家居擺設——細件都算，大件咁掗埞，好伏呀！
「Yes List」
1. 電子產品類：
科技發展迅速，電子產品價格愈來愈相宜，送一些入門級電子產品，更加有助同事之間在派對上開展話題，拆完禮物包大家傾到唔停口呀！
例子：藍牙揚聲器、無線充電器、外置硬碟、語音翻譯機、RFID卡套
2. 小型家電廚具類：
又靚又實用的小型家電和廚具，由於大家未必會經常用，所以平時就算見到抵買，都未必會買。
例子：迷你雙層蒸煮盒、香氛超聲波加濕器、迷你雪糕機、燜燒杯、迷你熨斗、迷你除塵蟎機
3. 愛護環境類：
人類唔「走塑」，地球就會不斷受微膠粒污染，想向同事推廣綠色生活，除了返工食飯一齊Green Monday，仲可以趁聖誕節送一些環保取向的產品。現在很多推廣環保的產品都係精美實用，買來送人絕不失禮。
例子：食品級矽膠摺疊式食物盒、環保麵包袋、環保餐具、手工皂
4. 美酒點心類：
佳節前夕總有唔少店舖推出美食禮盒，美酒、茶葉、朱古力、曲奇應有盡有，只要揀禮物時細心挑選有名氣或特別的牌子，呢類包裝精美、有節日氣氛的高級禮盒都係得體之選。
例子：易入口的Pinot Grigio白酒、汽泡清爽的Prosecco、英國著名品牌茶葉、手工朱古力禮盒、本地純素曲奇禮盒
5. 實用類：
普通人的生活，總是離不開隔個星期就去補購日用品，因此超級市場與百貨公司現金券真係非常實用，唔係淨係「師奶」先需要！
最後，小編代表全港打工仔講個心聲：若果老闆有份參加抽獎，不妨考慮提供幾日假期，事關對打工仔來說，抽中有薪假就最開心最實際！
例子：現金券、Gift Card、假期
文：Jie Leung
