要搵到一份理想、心儀嘅工作並唔容易，但不論你已經搵到抑或未搵到，你嘅「個人發展」對於你職涯都係至關重要。「個人發展」唔單單係局限於你嘅知識同工作經驗，以上兩項會隨住年月時間，人與人嘅差距會愈來愈少，咁咩先係重要？係喺職場上嘅「思考模式」同「待人處事」嘅方法。
一齊嚟睇下！
1. 了解「上面」嘅期望
所有嘅公司都會有一套自己獨有嘅「文化」（大公司更甚），而呢一啲文化會喺上司或者老細身上體現到，例如：有啲公司係「穩陣為主，咩都要打底」，有啲公司係「公司盈利行先，好Push，Take risk唔緊要」。打工仔首先要了解公司嘅文化，熟悉公司嘅價值觀，盡量配合，咁你同同事上司嘅關係會和諧啲，做嘢亦順利啲。
2. 積極同負面都係一個選擇
負面情緒永遠係工作嘅大敵，唔止會影響自己，仲會影響人。記住，工作嘅地方就用嚟工作，無論你處理緊嘅項目變化幾大幾差，盡量保持平穩冷靜，唔係要你做機械人，先解決問題，放工再用其他方法排解情緒。注意，切忌同你嘅上司同事抱怨同投訴，咁樣只會影響士氣同大家對你嘅印象。
3. Teamwork重要過個人成就
無論你係一個幾叻嘅人，如果你唔識Teamwork，獨行獨斷，喺重視團體精神同文化嘅職場，只會不斷撞板碰釘，亦無同事肯同你work。有時公司寧願要10個人有唔同技能，但可以合作做好5個Project；多過1個人自以為「好打得」，但只可以喺一個時間Handle一至兩個Project嘅人。
4. 願意承擔更多嘅職責
喺「躺平」至上嘅世界，講得最多可能係「呢單嘢唔係我跟開」。好多打工仔覺得上司老細鍾意「榨乾榨淨」員工，但職場上你要識分辨。例如公司接咗個新Project返嚟做，係需要人Manage同時需要學習使用一套新系統，呢個時候，你會唔會願意企出嚟講句：「我願意試下」？（當然，如果你能力不足，你企出嚟都未必畀你試⋯⋯）
5. 解決問題 > 提出問題
工作上我哋好容易發現到問題，當你想去搵你嘅老闆提出問題嗰陣，至少要袋定一個解決方法喺袋。即使老闆唔接受你嘅方法，你都似係一個Problem solver而唔係畀問題公司嘅人。
6. 少啲Gossip
八卦嘢喺沉悶嘅職場係好吸引人，又有得笑，同同事又有共同話題，一講Office就洋溢住歡喜快樂嘅氣氛。但你永遠唔知當時人幾時會爆發，尤其係八卦關於上司同老細，就更加可免則免。
7. 體貼下同事
工作嘅空間大同細都好，你同同事之間嘅距離只係隔咗一塊Partition，如果係Open area，得一張「豬肉枱」，人同人嘅距離近乎係零。請你講電話或者同同事面對面傾計嘅時候，將音量收細，或者轉一轉地點。
8. 你嘅私人生活盡量Keep secret
有打工仔會用公司電話同電郵做私人嘢，但永遠都唔知後面有幾多人睇到。要做嘅，離開公司範圍，唔好令自己成為其他人茶餘飯後嘅話題。
9. 社交媒體永遠好危險
假如你不幸地同你嘅上司同事互相Follow IG，Facebook add咗friend，請你留意你喺網絡上嘅言行，想宣洩對工作同老闆嘅不滿情緒，請做好事前功夫（closed friend同exclusion）。
10. 請「準時」返工
無老細鍾意人遲到。合約寫嘅朝9晚6同實際時間會有一定出入，有啲公司可能有遲到嘅Buffer，有啲公司要求員工早5分鐘返，留意下。
