輕鬆返工，愉快收工，係打工仔一至五嘅願望，但不幸地，返工除咗要應付做極都做唔完嘅工作外，有時仲要應付令人覺得「心很累」嘅「辦公室文化」（職場生存法則），相信無論你做咗10年嘢，定係一個職場新貴，對以下「辦公室文化」都唔會陌生，例如：
- 上司未走，下屬唔使旨意走；
- 同事之間分黨分派；
- 為咗增強團隊合作，每日所有同事都要一齊食lunch（呢個比較特別）等。
職場如戰場 要生存就要跟？
職場如戰場，入職嘅時候早啲發現呢啲「辦公室文化」，喺「戰場」上生存似乎會容易啲。好似上司未走，自己就唔走，目的係為咗畀上司覺得自己好努力；分黨分派嘅山頭文化，係為咗可以喺做嘢嘅時候有同伴互相照應。而且職場有唔少「Old seafood」，唔埋堆隨時變成佢哋欺負同排擠嘅對象，所以無論呢啲「辦公室文化」係幾唔合理，都唔會反抗，漸漸佢哋亦會變成「Old seafood」嘅一份子。
改變先有出路
當然，亦有人認為「辦公室文化」係職場上嘅陋習，應該要將佢哋根除，先能夠令工作環境同氣氛變好，例如最普遍嘅「OT文化」，好多公司都鍾意員工OT，甚至將OT時數作為審核表現嘅準則，導致員工寧願office hours嗰陣hea，到放工時間先OT先認真做嘢。雖然留喺公司嘅時間多咗，但工作效率並無增加，浪費咗正常工作時間之外，因為要OT連休息時間都少咗，咁樣loop落去其實即係攬炒。其實只要公司唔強迫OT，每個人都喺正常時間做好自己嘅工作，唔使OT，工作效率同氣氛又有改善，咁樣唔係好啲咩？。
不過，「辦公室文化」都係各個公司長時間約定俗成嘅習慣，唔係一朝一夕就可以改變。如果真係無辦法適應，又改變唔到嘅時候（咁易改變自己做咗老闆啦），轉工會係一個唔錯嘅選擇，你哋又點睇呢？
