呢排行過同事們個位幾乎都見到最少一隻摺紙比卡超係枱面，塗上鮮艷嘅顏色，畫上百變嘅表情。無錯啦，就係最近不停喺面書有教學出現個一款！點解會咁受歡迎？明明只係一件無聊小玩意咋嘛。
你會發現，愈低職位嘅同事，就算佢地個位已經唔夠位放File都好，總會逼滿自己鍾意嘅卡通人物公仔Figure扭蛋、別緻嘅手信和大張小張嘅好友自拍照，會花時間去佈置屬於自己嘅小空間。做到悶悶地，除咗按吓電話覆吓Message，口痕食吓零食，偷偷地上面書裝吓有咩Update資訊之外，都會睄吓個位有咩好「玩」。一分鐘時間，用隨手拎到嘅黃色Memo紙就可以整到一隻Mini版比卡超，有咩理由會唔玩先？老闆行過可以扮寫Memo，佢唔知原來我係畫緊啲眼耳口鼻，摺完用手邊五顏六色嘅螢光筆加啲創意整靚佢，同隔離位開心Share鬥吓邊個畫得萌又得！一件簡單小手作，好完美咁攝時間又令自己心情愉快度提升少少。
而愈高職位嘅人，佢地工作嘅地方統一係簡潔Tone，就係為咗要俾人印象專業，井然有序。開會開到天昏地暗，忙著覆海量嘅E貓和枱頭份份都話Urgent嘅文件等著簽名Approve時，佢地絕對會有想搵啲野輕鬆下嘅Moment！坐喺玻璃房，朝九晚五外面啲同事齊晒腳喺度，做到個人氣頂出晒煙都要繼續扮正經對住部Desktop，有咩好計呢？作為80後，比卡超的確係童年回憶，細個做完功課就會拿拿聲拎定包百力滋搭正5點坐定定睇卡通。而家見到佢又咁高人氣不如整番隻止下癮，睇住教學快快手就完成，細細粒解完悶可以收埋喺手袋拎返屋企又得，唔鍾意嘅話丟咗佢都無咩人發覺。下次行過下屬嘅位，多咗個話題話自己湊熱鬧整過，一舉幾得。
香港打工仔太需要鬆弛吓神經，唔同外國公司，可能有小休時間，Pantry有多款零食飲品任君選擇補充吓糖份等個人醒神啲，又或者間啲Corner位有張闊落嘅大梳化，有望到外面景色嘅窗，俾同事喺一個較舒適嘅地方訴吓心事。工時長，喺公司逗留嘅時間仲多過喺屋企，梗係要有啲小搞作娛樂吓。就算公司間中搞Workshop和興趣班，環顧身邊嘅都係同事，始終有一層隔膜，講說話依然就住就住，幾累都唔敢放下笑容，分分鐘壓力仲大咗。坐喺房，一個人，我摺隻比卡超又好，Minion又好，摺得樣衰唔驚有人掩著個口陰陰嘴笑嘛。
小熊個位就好乾淨，閒時整嘅小手作最多喺相片上分享，唔係想為咗喺Office營造啲咩嘅專業形象，只係準備隨時唔撈或者唔好彩被趕離場時可以執少啲野。咁嘅諗法係負面咗啲，新鮮人唔好學我，反而要學識苦中作樂，先可以喺職場Keep住十萬伏特，唔會輕易被磨蝕意志。
圖：Shutterstock
以上文章刊於《招職》。
