上一次講到，阿菲收到新公司的Offer，人工符合佢嘅預期，於是一口答應咗，並快快手向現職僱主遞埋辭職信。可是，當晚阿菲卻收到新公司HR電話，話人工由原本應承咗的一萬二千蚊，調整到一萬一千五百蚊。面對壓價Offer，究竟阿菲會點揀呢？
阿菲心忖，辭職信已遞，走唔返回頭路，又唔想有「真空期」，唯有忍痛含淚答應，一心希望將來學多啲新野搭夠呢個缺憾啦。到返新工嗰日，填好晒入職文件後，新上司就帶佢「遊花園」，點解個HR部門唔喺上次Interview嗰座Building度嘅？點解要喺另一座又殘又舊個天花仲甩緊灰嘅細房度做野？點解啲同事個個Welcome佢都無厘神氣嘅樣？點解上手剩低一大堆未分類嘅File未Handover就閃咗？
「點解一切唔係我預期咁嘅樣？我係咪做錯決定？點算好？」阿菲腦裡面一直盤旋住呢個疑惑。
喺佢在職嘅頭一個月，已食咗兩次散水餅，吹出嚟嘅風係話因為頂唔順工作量同人工唔成正比而走，成個Office瀰漫嘅氣氛同士氣好差。佢曾堅信可以學到野嘅念頭慢慢變得好模糊，日日接新野做，上司發晦氣口頭講完就算，無Checklist無Sample比下屬仔細跟著做，一整錯或者個Draft嘅字眼唔啱佢心水就藐嘴藐舌。同時間，又要經常加班執上手亂七八糟嘅手尾，唔夠瞓令佢脾氣變差，仲要忍受完全無System可言嘅工序，學到啲咩？咪就係一片混亂中點樣趕Deadline同提升EQ！忍咗三個月，枱頭放咗封過Probation嘅信，一蚊都無加，一句讚賞都無，唔知點解係個一刻，阿菲徹底失望了，「奉獻」咗三個月嘅時間如同白做。
忍唔到唔等於輸，見識過有幾惡劣都係一種經歷，做打工仔要識得保障自己，一日未簽份合約作實，一日都唔好心急遞信住，而家陷阱太多了。其實打從一開始知道呢間公司連五百蚊都要壓，我一定Say no，寧願唔做。你無誠意請我，一係就唔好出Offer比我，唔需要用五百蚊試我底線！因為我Foresee到，如果今舖應承得，以後有排被你恰！
以上文章刊於《招職》。
