人都是喜歡備受關注，被需要的。無咗自我嘅存在感，就彷彿做甚麼都唔係值得被記錄嘅一回事。
認清刷存在感的人
身處職場，你會見到最普遍嘅依然係狼狽地刷存在感嘅一群。即使係看似殺傷力最低嘅茶水姐姐，都生怕你會認為佢喺公司只係唔重要嘅小小微塵，每逢我地午飯時叮飯盒，收拾活動後嘅會議室，或者拜託佢幫忙碎一大疊廢紙時，佢都會借故強調佢呢個職位嘅重要性。「我啊，日日見晒你地咁多人出出入入，幾時邊個係茶水間講啲咩做啲咩我都一清二楚架。聽講啊，最近十樓個秘書遞咗信唔做啦，啱啱過試用期就走，佢服侍果位老闆出咗名難湊架啦，又一個頂唔順啦！」
我知我知，茶水姐姐與公司入面其他人毫無利益衝突，同任何人都可以聊天。而且，佢嘅工作位置唔受到限制，所有部門或者大老闆嘅私人房來去自如，根本就係神級嘅天文台。隨佢嘅心情，將有聽到嘅無聽到嘅都一一當做話題散播出去。唔好睇輕公司低微嘅職位，茶水姐姐、Reception姐姐、公司司機哥哥，唔小心得罪佢地，可能就會喺老闆面前「厚多士」放風講下你嘅壞話。講嘅人無責任，講完心情舒暢，而你？就急住想辦法收科吧！
所以如果你想請佢地幫忙而忘記咗好好稱呼，「喂」、「你啊」、「唔該」、「過一過嚟啦」、「阿邊個」，聽到呢一連串嘅叫法，佢地絕對係會借咗聾耳陳對耳。認清喜歡刷存在感嘅人嘅諗法，係其中一樣職場求生心得。
為何寧願刷無力感
不過，遊戲嘅玩法隨著時代會轉變，話時話，你地覺唔覺得試圖刷無力感嘅人開始湧現係職場？
反正返工嘅模式和工作量都係身不由己，一早已洩氣對自己嘅Career path唔抱有期望，倒不如大被冚過頭，咩都事不關己咪唔使煩惱囉！
總會見到，有一班新入職嘅，或者年資長嘅，對事事都提不起勁，即使老闆請飲貴價下午茶，都感覺行出嚟拎個免費餐返埋位都好浪費佢地力氣咁，日日只想合埋眼快啲熬過喺公司嘅九小時。佢地可能曾經有過對職場嘅衝勁，Seed已爆去加班，但上司永遠講一套做一套，工夫沒完沒了亦只淪為內鬥鬼打鬼嘅工具。辦公室政治唔係個個都想被牽涉其中，自己也不過係食物鏈最底層嘅浮游生物，不如就當我不存在，將傷害減到最輕微。好快好快，就係因為經歷過百般無奈嘅情況，迅間決定唔再投放心力喺工作上。
辭職轉個環境？唔好啦。唔排除去到第二間公司同樣係咁，無謂白費時間去重頭適應。好累了。刻意去令本來忐忑嘅自己變得麻木，唔係創傷嘅特效藥，反而係加速身心衰老嘅毒藥。
一個內心富足嘅人，從來唔需要特意去刷存在感，佢已然透徹了解到自己活著嘅意義。而一個無希望嘅人，亦無需要去刷無力感，佢自然會眼白白讓機會全流失而毫無傷感感覺。
以上文章刊於《招職》。
