品酒師，又名Sommelier，美國通常簡稱「Somm」。呢份工好神秘，比人印象通常都係搖下酒杯嘆下靚酒咁，好Pro好型，事實上品酒師嘅工作包括啲乜嘢呢？
品酒師究竟係做啲乜？
1. 提供侍酒服務：品酒師最重要嘅工作，就係Serve客人；由最基本嘅落杯斟酒，以至介紹酒款／飲品，甚至提供酒與食物配搭嘅建議。除咗喺餐廳度工作，背後其實好多日常運作，例如抹杯、試下用作餐廳餐酒嘅酒有冇變壞、列印Wine Menu。除了葡萄酒外，烈酒、啤酒、日本清酒、咖啡，甚至水同雪茄都要識。
2. 設計酒單：高級品酒師要設計酒單 ( Wine list )，即係決定餐廳銷售哪些酒，內容包括選酒、Check價錢，與供應商聯絡、落單等。品酒師就要化身為小老闆，計算成本、定價、利潤；同埋要管理酒倉，定時點貨。中小型餐廳大概有幾十支酒，酒店或星級餐廳的酒款數量會更多。
3. 品酒活動：間中要舉行品酒活動，例如提供有噱頭嘅葡萄酒品牌作餐酒、食物與酒配搭的不同主題晚宴等。這些活動不但為了招徠生意、為餐廳宣傳及追Sales target，更重要係為客人提供獨特的餐飲體驗，從而希望他們再次惠顧。
4. 培訓：Head of Sommelier或Wine Director更要為屬下的品酒師及侍應提供不同的酒水培訓，有時仲要邀請外國的釀酒師及酒莊代表來香港與客人分享心得。
品酒師給人的印象，通常都係搖下酒杯嘆下靚酒，其實品酒師最重要的工作是為客人提供侍酒服務。
品酒師係咪要千杯不醉？
見工時，HR唔會叫你表演酒量嘅。不過做得品酒師就起碼要飲得幾杯。雖然平日工作唔需要「劈酒」，但闊綽嘅客人會請飲酒。曾經試過有客人開DRC、La Tache等超級名酒，請品酒師飲埋一份，分分鐘一支酒仲多過一個月人工。有機會試靚酒，增廣見聞，係份工嘅樂趣。最重要唔係你嘅肝功能，係你嘅酒知識，是否可以專業地向客人建議酒款。
品酒師都要跑數？
中國第一位品酒大師 ( Master Sommelier, MS ) 呂楊就講過，一個成功嘅品酒師同時係一個出色嘅Sales。因為酒水係餐廳嘅重要收入。咁係咪做得品酒師都要跑數？唔一定。有啲酒店品酒師唔使跑數，但有喺會所餐廳做的品酒師要跑數。以品酒師Kelly為例，佢間餐廳比較大，有賣啲貴酒，每個月Takeaway跑成70至80萬元，咪話冇壓力。
有幾多人工？
品酒師呢行，好睇經驗、國籍、有甚麼專業資格同埋名氣。贏多啲業界品酒師比賽，可以提升名氣。考多一個專業資格，通常人工又會高啲，晉升機會亦會增加。如果喺五星級酒店或者米之蓮餐廳做過，自然會加分啦。以下喺大概嘅薪酬：
Assistant Sommelier 12,000至13,000元
Sommelier 15,000至30,000元
Head Sommelier 30,000至50,000元
Wine Director 50,000至60,000元
另外，餐廳、酒店及會所嘅人工都唔同。餐廳有貼士，每個月大概2,000至3,000元，不過間間唔同好睇客路。喺酒店做，好處係年底有時派三至四個月嘅花紅。會所就冇得收貼士，但底薪比較高，例如Sommelier職級的 可以去到27,000至28,000元。
酒水係一間餐廳的重要收入及利潤來源，所以酒單的設計必須認真思考。中小型餐廳的酒單大概有幾十支酒，酒店或星級餐廳的酒款數量會更多。
如何入行？做開Waiter跳去做品酒師得唔得？
入行做Assistant Sommelier，HR要求應徵者對酒有一定認識。如果想做葡萄酒方面嘅品酒師，最起碼要有WSET level 2的資歷。如果想做日本清酒嘅品酒師，就需要有SSI國際唎酒師資格。
WSET課程好多地方都有得學，包括某間上環較多業內人士進修嘅學校、某香港葡萄酒大師開嘅學校、各大學院校嘅校外進修部，仲有各大葡萄酒學校等。至於SSI國際唎酒師就較少地方有得讀，行內最出名就係某間喺佐敦嘅學校。唔係話入咗行上司唔會教，但係一張白紙乜都唔識，真係好難Show到比HR睇你對呢行有興趣。
擁有十年經驗兼獲獎無數嘅Wallace Lo，現為高級日式餐廳Haku的首席品酒師。佢認為新人入行最緊要係有Passion。對酒有熱誠，先會做得好。酒嘅產地同酒莊實在太多，冇興趣好難記得咁多知識。另外，曾經喺高級餐廳做過侍應的會加分，始終Service係品酒師其中一項重要工作。
對於有興趣投身品酒師工作的人士，Wallace Lo建議最重要是對酒及服務抱有熱誠，才會做得好。因為酒嘅產地同酒莊實在太多，冇興趣好難記得咁多知識。
女生也可當品酒師嗎？
一般人覺得品酒師通常是男人及法國人。香港的女品酒師Kelly亦笑說有時啲客誤以為佢係帶位員，仲叫佢請個品酒師過來。面對呢啲尷尬場面，保持專業地繼續侍酒，最終個客都會相信你。另外，品酒師的工都需要體力，執貨、攞貨、搬貨一手包辦。雖然有手推車，但一箱12支酒都係自己搬上手推車。話雖如此，女生當品酒師都有好處嘅。一般人覺得女生較Soft，呢一點令推銷變得容易。啲客見你係女生，都唔會點難為你。若有能力兼有熱誠，女品酒師也可獨當一面。
初入行的新手有乜嘢要注意？
伏位一：開香檳或氣泡酒，千祈唔好當平時啲紅、白酒咁開。要學識正確開酒嘅方法，唔係賽車冠軍頒獎禮，唔好開到「Pop」一聲，唔單只將啲酒噴曬出嚟，更重要係個酒塞 ( Cork ) 都會噴出嚟傷到人或打爛嘢。
伏位二：舊酒個酒塞好易爛，唔識開好易開到成支酒都係木碎，冇信心就要搵前輩幫手。
伏位三：斟酒唔好滴到周圍都係，滴到啲客件名牌衫咁就麻煩啦。
文：Crystal Chan
