雖然都係文職，但學校處理的文件、工作流程同私人機構都有唔少分別，所以唔少學校請初級文員，都未必會要求應徵者擁有文職工作經驗，但就較為着重應徵者的學歷。
問：做學校書記要有乜野入職要求？人工幾多？
答：始終係教育機構，對學歷有一定要求，初級文員正常要求係中學畢業，部分學校更會優先考慮持有學士學歷應徵者。因為近年學校書記算係搶手工作，每次請人都吸引唔少人應徵，所以持有大專以上學歷，先較容易獲得見工機會。人工方面，大約月薪11,000元，正常起步薪金與一般文職差不多，不過亦有一些合約制初級文員，薪金會低至9,000元。
問：面試會問乜？
答：初級文員同高級文員，面試時問的問題可以好唔同。初級文員，特別係合約制的，負責面試的學校行政人員 ( 如校長、副校 ) 其實最怕你做做吓唔做。所以除了問基本嘢如電腦技能、對學校工作環境有幾認識，亦會特別問到對合約工的睇法，甚至打聽你有沒有進修大計。因為從他們經驗，正在進修的書記都會求穩定，較少機會忽然跳船。至於較高級的書記職位，問題就會圍繞工作範圍，例如學校會計知識，管理經驗等。
問：平日工作做啲乜？有乜工作指標?
答：同樣道理，初級書記同高級書記負責的工作可以有很大分別，初級書記可能做一、兩年，都係處理簡單文書、處理點名簿、處理學生求助及聽電話等「入門級」工作。初級文員負責的大都是較規律的工作，即使有突發事件都係老師及學校管理層處理，工作壓力確實較私人公司細。
至於高級書記，既可能主力做校長及副校的大秘書，另一熱門核心工作係管理工友，又或處理招標工作。如果係負責會計的書記，由於掌控很重要的錢銀工作，反而會較專注於會計範疇工作。所以有不少資深書記都認為，讀會計出身轉型到學校做書記，其實有着數。
近十多年，部分書記還多了一項新興工作，就係電腦系統支援。雖然學校會請電腦技術員，但技術員手得一雙，很多時都係優先處理電腦室及學生電腦的問題。所以有學校會聘請有電腦底的書記，幫助學校行政人員及教職員的電腦問題。
問：使唔使跟其他同事合作？
答：學校單係教職員都六、七十人，規模大過一間中小企，再加上要支援學生，你每日都要與同事合作及應付「人」的問題。很多時候老師及學生帶來的任務及求助都係又急又難，例如忽然要安排人手準備某個課室及特別室。與同事合作另一大挑戰係管理工友，因為現在失業率處於歷史新低，學校要請工友並不容易，肯嚟做的又不乏「性格」大師，要指令他們工作同時又要避免刺激他們情緒，對不少書記來說是一項既考EQ又考管理功力的任務。
問：點解做呢行？有乜好做？
答：當初我是先做教學助理，後來一直緊密合作的老師獲晉升為校長，我就獲這名老師推薦轉任書記，而且是一份「長工」 。換言之，我是遇到貴人的幸運兒。對我而言，書記工作勝在有規律，很多事情都有步驟及細則可以參考，只要肯勤力刨文件，你毋須「每事問」都可以摸熟工作上的竅門。
不過近年學校講書記都傾向用合約制，要由合約轉「長工」，你既可能要遇到貴人，亦要掌握學校較吃香的技能如電腦、會計甚至物業管理。現在入行另一隱憂是開始有老師為減輕工作壓力自願轉為書記，有這批超級對手，書記想上位就更難了。
文：Peter Cheung
