( 上回提到：Stella跟媽媽坦露內心感受後，母女之關係拉近了。)
吃過媽媽準備的西瓜後，內心感覺特別清涼、平靜。想動手把碗筷執拾，媽媽連忙說：「唔使呀，妳坐吓休息吓，睇吓電視啦。我好快洗埋啲碗先。」
「媽，轉頭先洗啦，一齊坐低休息下先？」
「唔好呀，快快趣洗完，放耐咗，唔好洗 ⋯⋯」語音剛落，只見媽媽已雙手把餐具捧到廚房去了。
以前的Stella，一定會在因這「小事」跟媽媽也爭吵一小場。「咁心急，都唔知妳急乜 ⋯⋯」、「都唔知係乜嘢歪理嚟架，放耐咗會唔好洗嘅 ⋯⋯」、「一家人食餐飯都要趕頭趕命咁 ⋯⋯」，一些以往肯定會出自Stella口中的「對白」，語氣也必然是帶着滿滿的批判與不耐煩。然而，此刻Stella的內心，所接收到的是：
「媽媽會有這般急性子的個性，相信內在一定是很缺乏安全感了；或者是，她很想獲得身邊人的愛與認同，因而透過急速完成及做好每一件事，來讓別人看到自己，是一種存在感的索取。」
當思維是從愛出發，一切也改變了。由原本會自動猛然地評擊媽媽，一轉念，變成由衷地諒解。於是，沒有多說一句話，由看着媽媽在廚房工作的背影，Stella臉上只是微微一笑，回過頭來，心滿意足地拿起搖控器，打算邊看電視，邊等待媽媽完成後出來再彼此聊天。
「再次有示威者衝擊警隊的防線，造成多人受傷 ⋯⋯ 政府強烈譴責示威者衝擊的行為 ⋯⋯」電視傳來的，是一幕又一幕的衝突畫面；類似的片段，已經在過去數星期不斷重覆著，不同的，只是地點跟衝突的規模罷了。
停不了的考驗
「又嚟衝突！唉，呢班無晒理性嘅後生仔，成日就係想攪亂香港，要攪到幾時先得架 ⋯⋯」媽媽在廚房大喊出來。Stella未及回應前，媽媽激動地再說：
「個社會比咁多資源、機會你地去讀書呀、明白事理呀，竟然最後就用嚟反抗返個政府；我地納稅人嘅錢，就係咁樣浪費哂啦！真係一班廢青！」
「媽，妳點可以咁講架 ⋯⋯ 班年輕人都係想反映佢地嘅訴求啫 ⋯⋯ 個政府係咪都應該有責任呢；咁多人出嚟遊行、發聲，佢地都係唔回應 ⋯⋯」Stella顯然被媽媽的反應刺激了。
「年輕人就做返年輕人應該做嘅事啦，讀好啲書，返工勤力、盡心做嘢，返屋企孝敬父母，呢啲就係佢地嘅責任啦⋯⋯自己都未做好，就去要求人地乜、要求人地物 ⋯⋯」不知有否清晰地聽到女兒的回應，媽媽仍是振振有詞地發表她的看法。
Stella此刻真的感到非常不憤。聽到媽媽這樣無情地去批判在她眼中認為是公義的事，一團怒火，隨之而便升起上來了！（待續）
