返工唔係生活，但佢佔據咗生活。一個人一日最起碼三份一嘅時間奉獻咗畀工作（老實講唔止），如果屋企同公司距離遠，搭車來回又用個幾兩個鐘，唔好講私人時間，瞓覺時間都所剩無幾，但為咗三餐都無辦法。喺忙碌嘅工作生活入面，打工仔要嘅嘢可能好簡單，就係以下幾樣：
1. 一個醒神嘅早餐
無論你係喺屋企食，喺茶記食，抑或返到公司先食，食個靚早餐先有充足嘅能量處理朝早或者尋晚未完成嘅工作，當然唔少得一杯用嚟「招魂」嘅咖啡，聞一聞，飲兩啖，即刻回復狀態！
2. 一班啱傾嘅同事
一日困住喺office 8-10個鐘，長時間對住電腦做嘢，覆email，Zoom meeting，中間自己放break最好就係同同事吹水輕鬆下。但啱傾嘅同事永遠都係可遇不可求，遇到肯聽你呻又唔篤你背脊嘅同事係緣份嚟，有嘅話要珍惜，無嘅話⋯⋯就入廁所閉目養神5分鐘算（記得較鬧鐘）。
3. 一個唔趕嘅Lunch hour
忙完一個朝早，又到食晏嘅時間，但你會發現等位嘅時間永遠多過真係食飯嘅時間，三扒兩撥又趕頭趕命返公司繼續做，有時都覺得有啲消化不良。所以你會發現愈來愈多同事嗌外賣，又或者帶飯，食完可能仲有半個鐘恰下，或者上下網煲下劇，可以叉下電。
4. 一個體諒人嘅上司
唔同職位有唔同煩惱，大家都明白一個道理：「都係做嘢啫」。而上司明明以前都做過人下屬，點解唔識體諒下做細嘅同事呢？做得唔錯，嫌你做得未夠好；做錯少少，鏟到上天花板，係幾影響士氣⋯⋯
5. 一部無問題嘅電腦
工作嘅質素同你嘅工具係掛鉤嘅，正常打工仔都係用公司電腦，而公司電腦係好人性化，永遠喺你最忙嘅時候先會出問題，無限loading、藍畫面、自動重新開機⋯⋯ 係咪好有親切感？記得每15分鐘save一次file喇。
6. 一個見到太陽嘅機會
唔係講返工嗰一刻，而係收工嗰一刻。唔知打工仔有無試過放工見到太陽仲未落山，嗰種感覺真係好神奇，好似仲有好多時間用咁。不過香港打工仔普遍都係OT開，應該要轉工第一日返工先有機會試到。（轉工傳送門：撳呢度）
7. 一個追到市價嘅人工
返工講到尾都係為咗份糧，唔通為興趣咩。百物騰貴，咩都加價，唯獨人工唔加，公平咩！（年中報告又話平均加3.2%⋯⋯）但呢幾年唔係每個行業都咁好景，既然呢度無得加，不如搵過份工等新公司加畀你啦！（轉工傳送門：撳呢度）
