由畢業開始喺職場打滾，幸運啲嘅人好快會搵到自己嘅career path，過得三五七年，唔經唔覺發現自己已經爬到公司中層嘅位置。到咗中層，人工有返咁上下，係時候買樓、結婚、生BB，洗費一日大過一日，然後突然發現原來自己已經身處危機當中。
危機可以係突如其來，我有位朋友叫宋禮勤，係紅魔鬼公司嘅開國功臣。佢因爲做事勤力認真，好快就升到中層位置。喺中層，又要應付老細，又要睇住班細，慢慢總算應付到。做咗幾年，分店開完一間又一間，宋禮勤見公司生意好咗，份工又穩定咗，人工又加得唔錯，係時候成家立室。點知就喺罷完喜酒一個月後，有一日無端端畀老細叫咗入房。
「宋禮勤，我知你平時好幫得手，公司有今日嘅成績你都居功不少。你睇下，嗰次你送畀我個相架我都仲有keep住㗎。」
宋禮勤心諗，啲說話咁好聽，莫非想升我職？
「不過上次你處理兵工廠公司個project我就唔係好滿意。公司會有新方向，你呢個職位我地需要另一類型嘅員工，所以我地嘅合作關係就到此為止啦。」
聽到呢度，宋禮勤唔敢相信自己嘅耳朵，佢為紅魔鬼打江山，自己仲成日送禮畀老細，估唔到自己會被炒。
「雖然我地嘅關係要結束，我額外會賠多一個月錢畀你。」
宋禮勤心諗，我平時送畀你啲禮物都唔止一個月人工。不過老細既然已經決定咗，唯有接受現實，秒入失業大軍。
總括嚟講，中層人士可以有三大危機：
危機一：中層夾心餅
人到中層，發現呢個位置上下不討好。夾喺中間，又要應付老細要求，又要照顧下面班細嘅感受。例如想爭取下加下屬人工，但老細一句no way，啲細嘅怨氣沖天，對你怒目而視。處理得唔好甚至變成管治問題，最後影響份Appraisal，直接影響份工嘅穩定性。
危機二：孭鑊高危一族
中高層每日都要做好多管理上嘅決定，有一日如果唔覺意爆咗隻鑊，身居要職嘅高層一個閃身就避開隻鑊，隻鑊從天而降，稍有良心嘅你，唔想要啲細嘅孭，結果就自己孭。不過你仔細老婆嫩，出咗咩事，點對得住列祖列宗？
危機三：被消失對象
經濟有周期，人生總會遇到幾次經濟衰退。「經營環境轉差，營運環境持續惡化，需要同事與公司共度時艱。」呢幾句係咪熟口熟面？通常講完之後，就開始「共度時艱」嘅裁員計劃。中層人士人工有返咁上下，好可能成為公司開源節流嘅理想開刀對象。
被公司放棄可以嚟得好突然，啲人話高處不勝寒，其實中層都好鬼寒。中層做夾心餅之餘，又要面對被消失嘅高風險。如果唔想被消失之後搵唔到後路，最緊要keep住裝備自己，自我增值，仔細老婆嫩，睇⋯住呀！
