你身邊有冇一個朋友成日同你擤：
「返工冇朋友好鬼悶。」
「個個同事都冇個好人。」
「公司係一個永遠都交唔到朋友嘅地方。」
如果你有朋友成日都講呢啲說話，佢好可能係患上咗「渴望有班好同事症候群」。要醫好呢個病，佢返工最需要嘅係搵返一班好同事。
其實一日返工流流長，做嘢周不時會遇到唔如意嘅事。如果成日都要對住一班黑口黑面、搬弄是非、背後會插你一刀嘅同事，命仔都會短幾年。如果你問我返工最重要係咩，唔係錢、唔係女，最重要係呢啲一齊做嘢會開心嘅好同事。
1. 唱歌畀你聽嘅同事
有啲同事好特別，做做下嘢會突然間想唱返兩嘴，而且仲會旁若無人、上曬身咁。唱歌可以輕鬆氣氛，如果佢唱得好聽，直頭可以當聽免費音樂會，喺繁忙嘅環境當中舒緩一下緊張氣氛。但就算佢唱得唔好聽，至少都可以幫你醒一醒神，同埋引你笑一笑，世界更美妙。
2. 會約你去街嘅同事
同事嘅關係通常都止於同工作有關嘅事上面，放左工就各散東西，生死不相往來，直到聽日九點返工先再開始。但係真正嘅好同事，佢會當你係friend，放工會約你去街、夜晚會whatsapp問你瞓咗未、放假約你去郊遊，就算有一日佢離開咗公司，你地仲可以係永遠嘅好朋友。
3. 關心你嘅同事
辦公室裡面有時可能會子彈橫飛、唇槍舌戰，特別如果受咗老細嘅冤屈氣，嬲起上嚟，條氣頂住頂住真係好易死。如果有位識得關心你嘅同事，第一個走埋嚟安慰你，而且佢會同你同仇敵愾，一齊講老細壞話，條氣順返啲，命仔都冇咁易短幾年。
4. 開免費藥房嘅同事
喺公司做做下嘢，你有你做嘢、佢有佢忙碌，突然發現自己有關節痛點算？如果你有個櫃桶有齊全藥物，又唔介意同大家分享嘅好同事，你一定要好好珍惜佢。人總有唔舒服嘅時候，特別係流感季節，好多人病住都要繼續返工。感冒初起，有人送粒維他命C沖劑畀你，直頭係愛呀，哈利。
5. 幫你買埋飯嘅同事
嚟到一日裡面最神聖嘅lunch time，而你發現你根本係冇時間食lunch，當你諗住唯有捱肚餓頂落去，突然有把溫柔嘅聲音問你：「駛唔駛幫你買飯盒呀？」呢一句其實都幾窩心。雖然只係舉手之勞，但係唔係人人都會主動做。幫你買飯嘅好同事，絕對係好同事。
6. 肯教你嘢嘅同事
有一類人好怕被人超越，好怕有一日自己會喺公司失去價低然後畀人淘汰，所以佢地唔會將自己嘅知識教畀其他人。而同佢地相反，有另一種人好鍾意教人嘢，將自己學到嘅嘢共享，從而令團隊得到最大嘅益處。如果有呢種同事喺你左近，好好跟佢學習，除咗佢嘅知識，佢嘅態度更加值得學習。
