香港疫情不斷反覆，唔少公司都安排員工在家工作（Work from home）。對於新入職同事，第一日返工就WFH就更大挑戰性。
打工仔新入職撞正WFH：尷尬又迷茫
有打工仔喺討論區分享自己新入職撞正WFH嘅經歷，以「第1日返工就home office」為題表示：「聽日返份新工，HR今日打嚟叫我home office，同事上司無人識，做咩又唔知，淨係加我入大群每朝報到。使唔使喺大群自我介紹，好似有啲尷尬。」
網民：「恭喜你搵到好工」
估唔到都有唔少打工仔表示身同感受。一眾網民分享「一開始就WFH，仲未知幾時有得返office，新人WFH冇人理」、「我都係，第一日返去拎完電腦就WFH到依家…已經兩星期了，今日先有人教我做嘢，仲要係經Skype教，有嘢唔明又冇得即時問」。
不過正面啲去睇，新入職冇嘢做咪幾好。有網民樂觀表示「有糧出就理得佢啦，最多咪再搵過份，過咗通知期又可以食多一個月」、「所有嘢遲上手/遲交都有藉口」、「恭喜你搵到好工」。
其實第一日返工就WFH又有咩好驚喎，教你兩招等你就算WFH都可以快速適應公司文化。
積極搵同事打招呼
平時返工可以周圍搵同事傾偈，有嘢唔明都可以隨時請教同事或者上司。尤其係新入職嘅時候會有特別多疑問，需要同事嘅指導。
不過遙距辦公減少咗同事間交流，新人需要更加努力去學新嘢以及同新同事打好關係。呢個時候不妨試下主動聯絡上司，睇下有咩新工作安排。另外可以試下喺公司group勇敢覆同事message，例如“有冇嘢可以幫手？”，或者問一啲同工作有關嘅問題，儘量爭取好印象以及適應新工作環境。
了解新公司文化
間間公司文化唔同，新人事，新作風。有啲老細希望下屬經常更新工作進度，有啲反而唔太干預下屬。新人應該主動了解公司作風，儘量喺老細面前留低好印象。
HR通常會向新人brief員工手冊。員工手冊有好多基本信息，可以幫職場新人快啲了解公司。新入職嘅時候不妨花小小時間了解清楚公司政策，例如試用期，出糧方法，員工福利等等。如果仲有嘢唔明，可以主動問HR了解更多公司規矩。
打工仔就算喺職場打滾咗幾年，轉工到另一個新工作環境都會特別緊張。如果份工仲係唔適應，試下喺CPjobs搵份啱心水嘅工。
