人在職場，少不免遇到轉工或調組機會，想在新工作環境有好日子過，返新工第一日就要做好以下五件事。

請食Tea：強如大老闆萬歲都會請食Tea慰勞，可見請食嘢是與同事破冰的無敵招數，所以返新工第一日請食Tea開支無得慳，同事們享受了甜頭，至少對你第一印象都會好啲。

煩I.T.煩到盡：I.T. 部同事神龍見首不見尾，又對整機要求通常採取拖字訣，唯一例外係對待第一日返工的同事。所以應該把握第一日黃金機會煩盡他們，確保你部腦係上到網做到嘢。

學識用影印機：多用途影印機係辦公室最難搞器材之一，與其成日問人點用，倒不如趁第一日得閒，拎本簿記低要點學識點用。

記人名：你又唔係大老闆，基本上沒有條件叫人「邊個邊個」，所以趁第一日劃個Floor plan，記低同事名字及坐位分佈，就唔使下下再問人家個名。

跟同事食晏：即使你習慣帶飯，第一日都應該與同組同事出街食一次晏，既可以了解周邊食肆行情，食飯時又可以從同事口中八卦到公司行情，幫自己打定底適應新環境。

第一日發覺唔對路　就要搵定後路

假如你返新工第一個星期，已發覺無人預你食晏，無人教你用影印機，請食Tea竟然被同事白眼，I.T.話部電腦無問題但你用極都好多問題，再加超大量工作，你可能已經中了伏入了「黑店」。治本之道都係邊做邊極速搵定後路，運用cpjobs.com的「Job Alert」功能，你開立賬戶後，選擇「關鍵字」、「工種」、「行業」等個人化搜尋條件，系統便會自動幫你配對好工，並透過手機App及電郵定時放送，讓你可以把握黃金機會跳離賊船。

文：Peter Cheung

以上文章刊於《招職》。