每年農曆年後開工大吉，個個同事都好有默契，必定一朝早返到公司組成逗利是團，出發去逗利是。公司愈大，掃樓嘅時間就愈長，逗得愈多利是。唔知仲以為自己做咗議員助選團！經過咁多年大大小小嘅洗樓經驗，總有啲逗利是攻略同大家分享吓。

相信各位未婚男女過完年返工第一日，個樣一定係最精神、最開心，同埋最好禮貌嘅！不論見到任何人都先聲奪人，講句：「恭喜發財，新年進步。」總之識得幾多四字恭喜說話就講幾多，正常地應該都會逗到唔少利是。

想再逗多啲，最好係跟埋你嘅同事一齊洗樓！因為唔同嘅同事，都會跟公司入面唔同部門、唔同同事有深厚感情嘅，咁跟住一大班人去，就算你同派利是嗰位唔係好熟，順理成章都可以逗多封利是！

而派利是嗰班人，相信係過年後最唔願意返工嘅一群！ 因為經過各部門逗利是洗樓團嘅洗禮，派利是者即刻同佢哋嘅荷包一樣覺得好空虛、個心乸住乸住。如果你Miss咗洗樓團但中途被你遇見派利是嘅同事，千祈唔好放過機會，一於恭喜咗先！

不過，我曾經遇到一位同事，恭喜完佢一輪之後，佢竟然同我講：「你係咪真係未逗我封利是㗎？攞完又攞會生仔冇Pat Pat㗎！」嘩！我心諗，逗利是啫，把口唔使咁賤掛？如果你真係唔想派，咪放假放到過咗初七先返嚟囉！

我亦遇過一啲老細按職級或者同事去年嘅表現，派唔同金額嘅利是，好明顯佢哋會分開放喺左右兩邊衫袋，又或者分咗唔同款式嘅利是封。有時成班人去逗利是嘅好處，就係可以搏吓大霧，等佢比錯封大利是你！

又睇吓今年我同大家喺公司發唔發到大財！預祝各位今年洗樓嘅時候搵多啲！

以上文章刊於《招職》。