Career Advice 名家分享

【職場航行日誌】多句觸發打工仔怒火嘅話

面書開始被一句句令唔同行業打工仔極速噴火既說話橫掃,多到可以集結出版一本金句書!我地呢班打工仔,除左做唔完嘅Paper work,覆唔完嘅Email同埋應對唔切Client嘅Request外,仲要聽盡上司諷刺入骨嘅說話,咁就當然會爆發無窮怨氣和淚水湧現。

 

最令我發火嘅係被上司請我食死貓,「阿熊,你過黎,同我解釋下點解呢封信有幾隻字眼咁唔通順架,你唔係跟Template做嘅咩?而家你鍾意自己作野啊?」斷估我都唔會咁大膽!有得Copy & paste點會多餘去自創?「咦?我無自己作啊……一直都係跟上手留低個啲Template做。 」阿頭唔服氣,點可以俾人知佢怪錯下屬呢,即刻叫我搵舊File佢睇,又問其他Teammate手頭上個份Template係點既樣。結果發現,原來呢五年黎成條team用緊同一個錯Template,亦搵唔到錯誤來源。

無奢望聽到一句「唔好意思」,不過唔該唔好仲加插多幾句「人地俾Template你就當啱跟住黎做嘅啦?自己唔識睇清楚啲?」,「覺得唔對路就好出聲,唔好要我吓吓驗眼咁逐隻字同你睇先得嘅!」大姐,我點知同事做開俾我嘅Template都會錯,況且字眼通唔通順真係各花入各眼。最可笑係我阿頭Check咗同一類文件五年亦無發覺問題,定係到今日先至突然認真Check?

另一樣同樣令我難忍嘅係收工先黎逼人加班,特別逢星期五搭正五點半準備鬆人個陣……「阿熊,你唔好走住,等我Check埋少少野睇吓有無野先!」,「過黎講兩句,嚟緊有新Task要做。 」我曾經信以為真,「少少野」同埋「講兩句」係好快完成嘅事,眼尾稍到身邊既同事笑住迅速執野走人迎接Weekend,自己就愈嚟愈心酸等。講左半個鐘,再發呆喺位等左一個鐘…兩個鐘…「搞掂啦,平時收咗工無人煩住,我先可以靜靜咁Check野,你平時有唔少Careless mistake嘛,叫定你留低有咩即刻改就唔怕唔記得。 」然後一班靚太的士腳嚟Join佢。阿頭你就六點Call定工人煮飯,收工坐的士返屋企同老公仔女開餐,時間啱啱好。我後生我想星期五晚有得即刻走人去拍拖,你明唔明?啲文件我星期一交低俾你,點解你係都要等星期五放工先黎對?點解你自己做得慢夾硬要我做妹仔陪你?點解其他Team head唔係咁?

日復日返工未發洩到舊怨氣,又要領教新一輪既激氣事,火愈燒愈猛。成日話打工仔份糧包埋受氣,如果大家所做嘅野都只係Base on錢,咁本份以外嘅Task都應該用加班費補番數,無必要顧及其他人感受。講金唔講心嘛,咁咪收工即閃,少少唔舒服即請病假,被人罵即燶面,合約上無錯㗎,但係大家關係只會轉差,一去到修補唔到嘅地步時,一張紙就簡單結束僅有嘅連繫。觸發打工仔或者激起老闆把火嘅說話,盡量忍耐吧!將心比己,打工嘅為份糧,出糧嘅為左盤生意,為咩要刻意令人難受,講出嘅說話等於潑出去嘅水,傷害左就收唔番。

緊記,忍!