Advice Columnist

【職場心理學】老細話加人工任你開價，你會點應對？5大選擇睇清你係邊類人

By HR小薯蓉

喺一個月黑風高嘅晚上，就喺你準備收工嘅時候，你老細鬼鬼祟祟咁走埋你身邊，用詭異又帶點害羞嘅眼神望住你，彷彿對你傾慕已久，準備向你表白一樣。就喺呢個時候，佢用溫柔嘅聲線同你講：「你⋯⋯入一入嚟我房吖。」

你心諗：「大佬呀⋯⋯收工先嚟講？表白都聽日先講啦。」不過礙於佢係你老細，你唯有跟佢入去房坐低，當你諗緊點樣拒絕佢嘅時候，佢終於開口喇：「我呢一年好滿意你嘅表現，所以我想加你人工，你想加幾多？你開個價嚟啦。」

老細呢句語出驚人，你到底會點回應呢？

A. 起碼加一倍以上
B. 起碼加50%以上
C. 加10-20%就夠
D. 唔好加畀我
E. 減我人工吖

A. 衝動型

你覺得做嘢做得咁辛苦，難得有咁大隻蛤乸隨街跳，執輸行頭慘過敗家，要加就梗係加到盡。不過你有冇考慮過點解老細會咁樣畀你加人工？會唔會係想試探你？難道真係可以無底線咁畀你加人工？開天殺價，顯得你有點衝動，同埋缺乏深思熟慮，小心貪字得個貧哦。

B. 自信型

要求加50%，顯得你對自己過往嘅工作表現十分自信，認為自己嘅收入同工作表現完全不成正比，屬嚴重underpay。而且你認為自己對於老細嚟講係非常之重要，佢冇咗你直頭會帥位不保。不過老細對員工嘅表現評價，同員工自己對自己嘅評價通常都會有落差。有自信係好事，切忌過度評估自己嘅重要性，呢個世界冇話冇咗邊個唔得。其實如果你認為自己underpay咁多，會唔會你其實都係時候要轉工呢？

C. 中庸型

你比較偏向取中庸之道，覺得老細肯加你人工已經係一件開心事，開天殺價絕對唔係你style。加10-20%，又有唔少人工加，又可以保住老細嘅面子，仲可以畀老細知道你唔會想食咁佢隻車，有利長遠合作嘅關係。你通常都比較深思熟慮，而且你深明高處不勝寒嘅道理，老細咁做可能有不軌企圖，小心為上。

D. 小心眼型

選擇唔加，其實係想同老細講：「冇咩事都唔好攪我吖唔該。」你認為老細咁問你不過係想試探你，呢個一定係一個陷阱，愈加得多，責任就越大。加咗人工之後一定會分派啲唔想做咁工作畀你，覺得keep返呢個穩定嘅工作量已經足夠。如果你唔係一個有野心嘅人，呢個可能都係一個正確決定，但如果有心上位，就畀人一種欠缺自信同唔想負責任嘅感覺。

E. 高招型

「減我人工吖老細。」咁識講嘢，老細一定冧到爆，估唔到你咁識為佢著想，唔加畀你都唔好意思啦。其實呢招置之死地而後生，博得老細好感之餘又拋返個波畀佢做決定，其實都幾高招。不過如果遇著一啲唔識做嘅老細，可能高招變低招，結果真心覺得你唔駛加人工，感動地同你握握手講byebye，一蚊都唔加畀你，到時真係得返兩行眼淚。

HR小薯蓉

HR小薯蓉 Facebook Page blogger ，做咗HR十年多，由薯仔做到變薯蓉。見盡奇形怪狀CV、見工奇行種、各式各樣嚇死HR事件，深明做HR嘅辛酸。堅信人先係公司最大資產，專業能夠改變HR邪惡嘅形象。2016年開設個人網誌，2017年5月推出《我係邪惡HR》一書，貼地分享HR世界。

Keep reading

Related career advice

Advice Columnist

【職場心理學】「你真係好好人」——職場做好人真係心好累

老同事叫你幫手cover，你答「OK」。明明唔係你份工嘅報告，你做咗。上司突然笑住話「你最好㗎啦，幫吓手囉」，你又答應。有人要請假，組長望向你，你點頭。你係個 office 入面從來唔拒絕人嗰個。你覺得自己有責任心、識大體、係個好員工。但係年尾績效 review，你加人工加得最少。升職機會，留俾叫得出聲嗰個。你問上司，佢笑住話：「你知㗎啦，你咁好，去邊都得㗎。」你笑住話：「係囉，謝謝你。」返到廁所，你對住鏡望咗自己好耐。有時喺輔導室，我見到唔少「職場好人」，坐低之後說嘅第一句係：「我唔明白，我咁做嘢，點解佢哋反而唔尊重我？」你以為係你唔夠醒目、唔識爭取？唔係嘅。喺心理學入面，呢個叫「取悅行為」（Fawn Response）——一種透過持續迎合他人需求、避免任何衝突，令自己感到安全的應對模式（Walker, 2013）。成因可以係童年時學會「唔惹事就唔會出問題」，可以係職場上曾經開口卻被打壓，久而久之，「唔拒絕人」就成為你保護自己嘅方式。問題係，喺職場裡面，你嘅「好」好快會成為別人嘅理所當然。你嘅邊界越模糊，別人越唔需要尊重你。就好似一間便利店，二十四小時唔閂門——客人梗係唔會珍惜，因為你永遠都喺度。但係一間有排隊人龍嘅名店，有指定營業時間、要預訂，人哋反而珍而重之。你嘅時間同能量，係有價值嘅。邊界唔係叫你唔合作，係讓人知道你嘅付出值得被尊重。一個小練習：今個禮拜，選一件「唔係我份工、但我成日照答應」嘅事，試吓回應：「我而家手頭有嘢要處理，唔太方便。」唔需要解釋多，唔需要道歉。然後停一停，覺察一下自己嘅感受——係唔舒服，還是有一種陌生嘅輕鬆？第一次唔容易。但係你值得有人尊重你嘅邊界——包括你自己尊重你自己。「係」係一份禮物，喺你真心想話「係」嗰時候先有意義。今日，如果有人又嚟「你咁好，幫吓手囉」——停一停，深呼吸，覺察一下你心裡嘅第一個感受。你唔係唔友善。而係你都係一個有需要、有限度嘅人。呢個人值得你善待。參考資料Walker, P. (2013). Complex PTSD: From surviving to thriving. Azure Coyote.Brown, B. (2010). The gifts of imperfection. Hazelden Publishing.

Advice Columnist

CIMA recommends seven strategic policy priorities to support 2026 HK Government Policy Address and Five-Year Plan

The Chartered Institute of Management Accountants (CIMA), the world’s leading professional body for management accountants and one of the founding member bodies of the Association of International Certified Professional Accountants, has submitted strategic policy recommendations to Mr John KC Lee, GBM, SBS, PDSM, PMSM, Chief Executive of the Government of the Hong Kong Special Administrative Region ahead of his Hong Kong’s […]

Advice Columnist

AI提升效率，企業如何避免人才梯隊「斷層」？

人工智能（AI）加速進入職場，本地大學有調查顯示，73% 受訪在職港人工作中經常使用AI工具，遠高於全球平均31%，逾半初級員工卻擔心技能被AI取代。企業可以利用科技處理更多重複性工作，提升效率之餘，卻就帶來一個值得HR重新思考的問題：當部分Junior（年資較淺者）的入門工作可以由AI完成，企業未來的人才梯隊會否因此出現斷層？我認為企業衡量AI的價值時，不應只計算節省多少人手，更要思考如何利用科技重新設計人才培訓。 AI取代部分工作不能取代人才成長過去，年輕人往往由整理資料、撰寫報告、協助客戶等工作開始，在實戰中逐步建立專業能力。但當AI接手部分基礎工作，企業雖然可以提升效率，年輕人卻可能失去重要的學習階段。近期香港AI人才市場研究亦發現，企業對具經驗AI人才的需求增加，市場出現一定程度的「經驗錯配」。這反映企業面對的問題未必是缺乏人才，而是如何讓年輕人才有機會累積實戰經驗。以財富管理為例，年輕同事除了掌握市場及產品知識，更要學習如何理解客戶需要、分析問題、處理突發情況及承擔判斷責任。這些能力不能單靠AI建立。因此，企業可以考慮將Junior工作重新配置：要明白，人才培育也是一項長線投資。年輕人面對職涯變化，除了提升技能，也需要建立財務安全感。從財富管理角度，我會建議先做好三方面：財務規劃不只是累積資產，更是為自己保留選擇權。有了基本財務緩衝，年輕人便較有條件轉工、進修或嘗試新的職涯方向。 AI可以提升效率，但企業真正需要建立的，是一支既懂科技，又具備判斷力、溝通能力及責任感的團隊。今天的Junior，可能就是五年後的管理層。財富管理講求長線資產配置，人才發展亦然。企業投資下一代人才，員工投資自己，才能避免AI時代出現「工作效率提高，人才梯隊卻變薄」的矛盾。