上一次講到當年小熊初入職時，便有一班小花迅即埋身，打探小熊對其上司的印象。由於我跟著個麻煩上司，入職咗幾個月已經好困擾，呢班小花又點會放過可以進擊嘅機會呢？
好多時我地嘅合作係源於要宣傳或者喺機構活動上擔任工作人員，總會有多餘嘅時間可以閒談，當然喺我旁邊一齊數我上司，七情上面去同情我，鼓勵我有咩勞騷不妨講出嚟。見到咁嘅誠意，歷煉不足嘅自己唔多唔少會被打動，不過喺人地用咗幾個月時間儲夠要知道嘅事後，唔知點解就會極速通晒天，傳晒去相關人士嘅耳入面。
呢啲是與非即使有人搵你對質，只要你堅持係人地扭曲咗你嘅說法，尚有轉彎餘地，再高招去打擊你嘅係用方法直接干擾你嘅仕途。
喺公營機構入面，同事可以任意申請覺得合適嘅職位，而我都唔例外，好想擺脫黑心上司。湊巧隔離Team有同事升職去其他部門，騰出咗一個空缺，而呢條Team嘅Team head出咗名係好好先生。他對下屬全部都好包容，只要你做好份內事，日日準時收工唔會有意見，評核個分一定有咁鬆手得咁鬆手！對我嚟講好吸引，心思思想申請，蠢就蠢在走去問小花意見。「呢啲位係有經理Blessing先好去申請啊！同埋呢，聽講雖然本身個位係跟返原本呢個嘅，但係收到風之後會降Grade架，如果你走去做個降Grade位，都好唔抵啦！」聽完立刻對念頭止步，原來要有高層開聲先好去申請，否則只係晒時間，仲會被上司懷疑點解有去意，可能被佢進一步玩弄。
不出兩個月，真相大白了，有日食Lunch同專職請HR嘅前輩傾開計，佢問我點解咁頂唔順自己上司都唔申請呢個空缺，我一五一十將小花講嘅說話講返出嚟。佢好驚訝，話從來無傾過要將個位降Grade，而且小花們喺經理面前好落力介紹自己啲朋友好有心想嚟做。所以，結果就係請咗佢地朋友囉！
朋友？同伴？唔好諗得太簡單，每做一個重要嘅決定之前都唔應該只聽一面之詞，最後結果係點自己都有責任。
以上文章刊於《招職》。
