聖誕、新年，再到農曆新年，冬季長假期真係一浪接一浪。對部分打工仔來說，最痛苦莫過於拎咗假要「扮」去旅行，以下三個Case，唔知大家有無共鳴呢？
卡數、Grant Loan還到氣咳，點去？！
京都紅葉、北海道雪景、北歐極光，這類熱門甚至「攻頂」級的打工仔旅遊景點，我在大學時代已玩遍了，代價就係十多萬卡數加Grant Loan。
揹著一身債投身社會，才發現以職場新鮮人收入，每月扣除家用、還債及返工成本，不負數已經偷笑。但偏偏旅行正是同事間熱門話題，明明我只係想在長假期前後放一、兩天去打散工賺外快，同事們就不斷問我去邊旅行，為避免令他們掃興，就胡亂說自己去台北玩幾日。
於是這個「假期」出門打散工，日日都提心吊膽驚撞到同事。到最後一日深夜放工時在巴士站果然遇到同事，同事見我背著裝了散工制服的行李袋便問是否剛回到香港，我立即爽快話係，幸好我事前已在百貨公司食品部買了幾包減價台灣食品當手信，正所謂做戲做全套吧。
剛甩拖，只想「毒」自一人
我身邊的同事很奇怪，他們總以為後生仔一定有拖拍，而放長假就肯肯定與另一半去旅行。
確實我係有拖拍……個半月前囉。被飛後現仍在「療傷」中，又怎有興致去旅行。今個長假期拎兩日假，都係一心想躲在家煲劇煲電影便算。偏偏同事們又不斷問放假去邊度旅行，心情差唔想解釋就求其話去九州。剛說出口就後悔了，有同事拜託買零食買黑糖買燒酒，好在呢個世界有代購，掉張List去代購網執得幾多得幾多，加埋都係九百幾，總好過使成萬銀去獨遊。愈遊愈傷心。
我放假，只係為馬拉松「電競」
我根本唔鍾意去旅行，只喜歡宅在家打機、打機、打機呀，現在叫參與「電競」先夠Pro。電競也好打機也好，對我來講都好過去旅行。但同事唔係咁諗，佢哋覺得放長假就要去旅行，否則就唔好放。我唔想自爆放假只為打機，費事又要解釋一餐，當然識趣「扮」去旅行，頂多就拎之前阿爸阿媽去韓國的手信回去派。唉，唯一麻煩係要背定少少首爾景點扮有去。
聽完這三位打工仔「心聲」，大家下次聽到同事放假，係咪應該識做，唔好係咁問住人家去邊度旅行呢？
