早前「0+3」政策一出，相信唔少打工仔都已經計劃定趁聖誕及新年攞個長假出門旅行，感受外國節日氣氛。但放假前Handover交低手尾是職場難題之一，稍一不慎就會惹來同事怨氣。掌握三大絕技，就可以拆解此疑難放心去旅行。
1. 整理工作清單
放得長假，大家都會有心理準備放假前會忙得一團糟。問題就在「一團糟」這個狀態，很多時大家愈忙就愈亂，愈亂就愈忙，由此無限Loop下去，出門後只好掉低大堆工作手尾給同事交接。
要避免出現「一團糟」狀態，最好善用Excel / Google Sheet等平台做一個Handover簡表，列出手頭上的工作交接項目，並標示有哪些項目可以在出門前完成以及項目的緩急次序。下一步就可以順序奮力趕工，捱過這一步後，要拜託同事繼續跟進的項目就可以大幅縮減，自己亦不用心掛掛地出門。
2. 設定溝通方案
未完成的項目，在你放假期間難免會有客戶或合作單位透過電郵或來電查詢。因此大家設定放假自動回覆訊息時，都會列出幫手同事的名字及聯絡方法。
不過設定放假訊息時，最好行多兩步，首先是知會同事一聲，並與同事協商如何分工，避免你放假期間所有查詢都湧向某一名同事。第二步係知會客戶及合作單位一聲，既可以告知對方你將會放大假，同時匯報一下工作進度，當對方了解這些「第一手」資訊時，你放假期間向負責同事查詢的機會亦會相應減少，從而減輕「頂替」同事的工作量及壓力。
3. 人情債有借有還
放假交低手尾最常出現的錯誤想法，就係到埗後按同事要求買一些手信，彼此就無拖無欠。今時今日去旅行並不難，又有代購服務，問心其實唔太「恨」同事的手信，所以單靠手信就覺得還了同事人情就未免太天真。
要真正做到人情債有借有還，最實際的方法係出發前或回來後幫輕同事的工作，正式在分擔工作上做到有來有往。當然，另一樣要緊記係外遊時每日至少要Check一次電郵，了解一下手頭項目有沒有鑊氣，或需要你親自回覆的問題，抱著不聞不問態度暢遊異國，工作手尾就可能轉化為日後令你在公司難以過日子的導火線了。
