你會點證明自己嘅身價？成日開OT，證明自己好勤力？不斷叫人endorse自己LinkedIn上嘅能力？定係開會時不斷問問題，刷存在感？
五年前，筆者喺舊公司認識一位同事叫阿花。「阿花的故事」其實一啲都唔特別，中大畢業，做過六份工，每朝返九半，放七半，拎三萬六人工。佢當時嘅情況有如佢嘅口頭禪，「都係咁啦，碌得過就ok」。上年年中，舊同事聚會，阿花原來無聲無息地做咗老闆。自一次佢患上肺炎，住院停工一個月後，佢決心要為自己「做返啲嘢」。佢選擇咗去韓國學蛋糕裱花，考咗個導師牌之餘，而家仲同幾個同學做埋蛋糕用具生意。
阿花今年42歲。
五年前要評估阿花，大概用不上身價呢個詞，頂多只會估計佢值幾多錢人工。身價除咗講錢，亦包括一啲會令人impressed嘅價值。阿花如果冇選擇學裱花，繼續留喺辦公室做OL，佢真正嘅價值可能永遠都唔會顯露，亦未必會有人因為阿花而feeling impressed。搵到合適嘅platform，自身價值先會好好彰顯。
但好多時，人係需要一條導火線，trigger自己尋找一個更好platform。否則好地地，每月固定搵緊三萬六，邊個會走出自己嘅comfort zone？Trigger阿花嘅係一個「導火病」(i.e. 肺炎)，trigger我好多朋友嘅係一個「導火人」(i.e. 一個令佢哋好想轉工嘅人)。又或者發生咗一啲更差、更冇可挽救嘅事情，而令人想變。Sadly，呢啲「導火」嘅媒介多數都唔係好嘢。
進入職場初期，好多marketer都會覺得自己underpaid，普遍OT時間長，薪金低，平均時薪更直迫「最低工資」。屈屈不歡搞到每一兩年就轉工。但隨著職場年資漸長，有啲人會漸漸安於現狀，慢慢接受上司、公司甚至市場安排俾你嘅價值，失去再探討自己身價嘅動力。
以上並唔係鼓勵你不斷轉工，或者喺老細面前跳草裙舞，搏加三四千蚊人工，因為我相信你嘅真正身價亦不止於此。「身價除咗講錢，亦包括一啲會令人impressed嘅價值。」口碑、人際網絡、獨有技能，就算失敗嘅經驗都可以係你嘅過人之處，令人留下impression嘅價值。要數impressive person，碧咸可算係佼佼者。
效力曼聯時期嘅碧咸，96年半場笠死溫布頓門將成名，卻喺98世界杯，因為一腳無謂嘅犯規領紅，成為全英公敵。及後轉會皇家馬德里被雪藏，到洛杉磯銀河輸12碼攞聯賽亞軍，再到巴黎聖日耳門，願意將所有薪金全數捐助慈善機構，碧咸一點一滴累積自己嘅經驗，喺每一站不斷向別人證明自己嘅價值，不斷將自己球員身價 (at the same time，名人、品牌代言人、剪綵嘉賓等身價) 提高。而家，碧咸嘅角色延伸至球會老闆，早幾年前喺邁阿密成立一支足球隊，參與美職聯，之前仲話想簽埋美斯。
先懂得impress別人，別人先會開始評估你嘅身價，繼而開始懂得欣賞你。就算同一間公司，唔同崗位、唔同project，你亦可以視之為機會，發掘自己多一啲、認識自己多一啲。當然，老生常談，「機會係留畀有準備嘅人」，impression是好是壞，就睇閣下修行。
So far，你覺得自己有冇打出「身價波」？如果你未有答案，唔緊要，答下一題。
So far，你有冇打過一場好波？冇錯，係一場。五秒內答唔出，都唔緊要，你可以喺放工時間思考下，自己要點樣踢埋餘下嘅比賽，尋找自己真正身價。阿花可以，你都可以。
