有唔少朋友仔同我分享過，自從加入咗打工仔行列之後，個樣苦咗，心情沉重咗。咁大個人，明知老闆上司同事係點無得揀，永遠只係有Offer而個Compensation package合理嘅話，你會唔會Say yes？一係搏一鋪，唔係就咩都無。
做上司嘅未必了解，有時對下屬嘅一啲習慣性行為會好容易觸動到佢地神經。就好似下屬想請一日半日假咁樣，諗住同上司講聲再入個e-Leave佢會快手批假，點知要你解釋原因，又問長問短質疑你有無交低好工作先走去放假。唉，阿頭你自己一年廿幾日假，每逢新年奉旨Request兩至三星期大假陪啲仔女，從來無一齊商量過Leave plan，又一日假都唔俾同Team嘅同事疊住嚟放，我地已經讓晒你啦！
老實講，只要你講低邊位同事幫手Follow up手頭上嘅工作，我地唔會有意見，仲希望你充完電返嚟個人無咁崩緊，工作氣氛可以輕鬆啲。而到我地想享受應有嘅大假呢，阿頭你就驚住有麻煩手尾要跟。瑣碎野唔想自己做啫，唔使比一大輪說話我地聽然後好勉為其難咁批假嘅。係應得嘅權利嚟架喎，放假需要理由架咩？大家Friend底傾計知道下無所謂，唔係嘅話Non office hour嘅事你都要質詢，係咪霸道咗啲呢？
另一樣令下屬好介意嘅係往往拍爛檔幫手做完Extra work嘅時候，唔會Appreciate你嘅付出，理得你Lunch都要做，大汗疊細汗返Office飲杯水攤抖一陣時，上司見到你二話不說叫你即刻返位覆番E-mail睇咗枱面啲File佢。果個Moment真係好想喊！做HR好多時要一腳踼，特別係有Function搞活動，幾乎個個小薯都要出動架啦，話就話輪住嚟做，不過通常做開就搵番你，唔使重新教過，有問題又識執生嘛。
小熊試過不停體驗呢個小角色，係同一個Function，做搬運工人做表演者做歡樂小姐做遞咪員，頻撲完返埋位阿頭木無面情行過嚟，唔理我出去辛苦咗成日，點都要我OT做埋先准放工。我明嘅，有啲上司唔係想做到完全事不關己咁，係佢唔知點樣恰當地去關心個同事。表現得太親民嘅話，好似無晒威嚴，驚個細嘅好易得寸進尺踩住上。而保持階級距離不時施壓嘅話，起碼個細嘅會Get到要做好自己嘅工夫先，Extra work唔使太用心，咩係Core duties要分清楚！
要識得同下屬有個Friend得嚟又係公事上溝通得好嘅關係，係每個做Supervisor必定面對嘅難題。其實真正有實力嘅下屬，會絕對唔會去做舔鞋底，阿諛奉承嘅行動去換取上司嘅支持和讚賞，上司唔好誤會對佢地鬆懈啲，講句笑話就等於放低身份。一班小薯明知上面班Team head有時係身不由己，將我地用嚟做枱底交易，收收埋埋咁幫其他Team做野，不過只要如果上司肯坦白少少講下真正感受，多謝我地肯捱義氣，會喺Appraisal額外加分或者請食個Tea有啲甜頭開心下，成件事就完滿好多，唔會有Hard feeling，行多一步以後好做。
持續嘅扣分小動作係會令人好灰心，分分鐘咁就失去左右手，大家都係打工仔嚟啫，唔需要下下企喺高台望落去，嘗試企喺同一個位置去睇，上司就會發現，佢地嘅一小步對小薯嘅影響有幾多。
以上文章刊於《招職》。
