對於HR嘅誤解應該唔需要多講，大家都會認為一間公司入面嘅HR部門根本係可有可無兼且係萬惡嘅角色。我地作為中間人去處理各種事務和活動，太過唔得同事嘅歡心對工作係只有負面嘅影響，我地唔係為咗挑剔和製造是非而存在，而係好想比個全新嘅印象周遭與我地有合作嘅同事見到。
喺香港嘅工作環境入面，好人的確難做。大部分打工仔心態都係事不關己己不勞心，準時放工和有糧出就可以了。HR係好定壞，邊個會關心？
唔排除的確有啲守舊嘅HR會擺起姿態，板起臉孔去回答同事嘅所有查詢，不過年輕一代已經好少再有咁嘅情況。如果係屬於「一條龍」服務嘅HR，即係所有有關HR嘅查詢或問題都只有一個負責同事一手一腳去處理嘅話，其實工作量相當沉重。除咗量 多，回應速度亦唔可以怠慢，否則永遠做唔完。小熊正正就係擔當緊呢個角色，要處理嘅瑣碎事項有好多，但都時刻提醒自己唔可以因為做得累而態度惡劣。
但純粹只想喺人前做一個好人，等於虐待自己。
好多人會用盡你嘅善心，明知你會為咗保持形象而唔敢拒絕，就會得寸進尺去試探你。HR的確掌握晒同事嘅個人資料和面試安排，唔少人覺得你友善，就會開始借啲藉口想由你把口講多啲內幕消息。最常見就係問有邊啲內部員工被邀請去面試，透露吓考官評價係點，邊個最大機會成功等，如果我地做HR唔夠口密，以為賣個人情比部門高層，點知好快傳開咗消息，到時問責起上嚟受罪只有自己。又有時同事唔熟悉公司政策，想知道點樣預支假期，申請各式各樣嘅津貼和辭職程序等，你以為好心快手Send埋表格比佢填，唔想刻意請佢地Send request嚟先回覆，就好易中招。因為無前言睇得返，同事真係可以話係你Send錯表格，HR胡亂Email要求佢地填好附上表格。始終係對人嘅工作，態度上可以表現得友善啲，不過公事依然要公辦。
做咗幾年HR，久而久之練成職業病，喺公司隨時一拎起電話或者有同事直接搵自己，好自然就會喺臉上堆砌笑容。真心？假意？我都分唔清，亦唔重要，如果可以令對方感覺HR一向比人嘅殺傷力係減低咗，已經係成功改變HR形象嘅開始。
做好人之前首先要識得諗多一步保護自己，劃清楚底線，先會得到你想要嘅效果。
以上文章刊於《招職》。
