想做一個感覺親切嘅HR，識睇眉頭眼額係唔夠的，仲要留意住自己喺工作上微小嘅一舉一動，將自己潛移默化塑造一個成功嘅偽善形象。
自問脾氣麻麻，仲成日俾男朋友話我一有唔鍾意塊面就黑到出晒面，佢肯包容我就話無緊要啫，不過返工對住咁多唔同嘅面孔表現真我就一定輸蝕。識得小妹嘅通常會好奇點解一個宅女會揀做HR，唔係要處事好圓滑，Talk得又玩得架咩？當初揀呢一科去讀，係單純想搵一份文職工做。一向說話不多嘅我，做Presentation做FYP都係硬著頭皮將講稿死記硬背，唯一我唔怕嘅，係雙眼直望人講野，將要表達嘅訊息肯定咁傳入對方腦袋入面。
諗返起做第一份工時係年少氣盛，喜怒形於色。客仔遲交文件，同其他部門合作安排唔順利呢啲小事係咁NG會好上心，日復日喺E貓Send｢Kind reminder｣等唔到回覆，就會氣沖沖打電話去追。雖然話係為咗履行份內事，但係可能忽略左人地對我嘅觀感評價係點，被人喺背後指點話小薯仔懶巴閉發住脾氣做野。幾年過後，遇到同樣嘅Case已經自然跳過心煩氣燥嘅階段，有自己一套去處理。被無視多次Reminder，下次就順手cc佢上司俾啲壓力，再無反應不如親身拎住張後備Form行到去佢座位「請」佢即時填返，俾附近諸多八卦嘅同事眼望望，唔會仲好意思托我手踭掛？雖然心入面唔想咁，不過為咗交到貨，都要婉轉地逼迫吓同事。
而最難頂莫過於係被直屬上司NG用黎做御用黑鑊，一有任何Complain先對你嗌晒救命，指責你唔夠機警發現唔到問題，然後喺眾人面前無奈表示因為佢係你上司，就貌似冤屈負起責任。如果你忍唔住當場表現強烈不滿實會被秋後算賬，太溫馴又會中多幾次招。任由你心入面念幾多遍三字經，轉身去飲冰水又好，搣大脾握拳頭都好，只要一激動到花容失色就失去氣勢。做得HR，喺Policy同實際執行上大家做法常有出入有拗撬，唔敢出聲就會被淘汰。即使自己平時幾鵪鶉都好，去到呢啲位先作最壞打算，盡可能以得罪最少人嘅程度冷靜去解釋自己嘅做法，令人意識到你係硬食咗隻鑊先有用。但係當我喺戰場返回坐位時，驚恐嘅心情先逐漸浮現，想像會唔會俾上司照肺然後俾信叫我走呢？
公司總有一堆唔自律嘅客仔同埋咩都要瘋狂Urgent嘅老闆，喺人事部做野真係好棹忌人際關係唔好，日日絞盡腦汁去應對唔同情況，不知不覺就會「上身」。喺啲中同小同聚會特別明顯，自己一開口斯文又官腔，明明唔想笑嘴角會不受控上揚，野食一放枱會自動企起身分比佢地，講咗數之不盡咁多句「唔該」、「麻煩晒」同埋「唔好意思」，完場之後諗返起個心都寒一寒，頭先個位邊個黎？我唔識佢！
職業病不停NG傷身又傷神，係戰鬥格背後，藏著一大堆苦悶和怨氣，搞到工作以外棹忌時間變到「人唔似人，鬼唔似鬼」，小熊想喺放咗工就立刻抽離角色，睇黎仲要經歷一段長時間磨鍊先去到果個境界啦！
