好多大機構入面，都有一個統一嘅評核機制，Appraisal總分大致上分咗幾個Grading，做得耐嘅同事都心知肚明去到某一個Grading就會被暗指為Problem staff，雖然真相唔一定係咁都好啦。
我地有位負責處理Complaint嘅經理，呢排寧舍暴走得緊要，原來係睇緊幾單麻煩投訴。有位入職咗兩年嘅合約秘書，約滿在即，投訴自己上司近日工作上安排不當，專登比好多唔係佢職責嘅工作佢做，令佢無限加班。同事曾經作出不滿，最大控訴係「點解成條Team得我一個要做Add hoc野」覺得唔公平，喺自己Team meeting時提出過意見，佢老闆就梗係官方式回應「比多啲學習機會你」，部分Teammates表示不知情，願意分擔工作，但老闆如果Say yes仲點落台，所以立即拒絕咗。Over workload加上「唔聽話」嘅結果就係Appraisal report降Grade來個下馬威。呢啲事喺私人公司真係兵家常事，你唔Like咪唔好撈囉，小薯換過個幾咁閒。不過喺公營機構玩法就有啲唔同，要炒一個人要經過多重程序，唯一可以做嘅就係諗啲計仔逼佢走人，最有效一招就係整花Appraisal report，但係無理毀人前途又真係罪大惡極。
終於，心理壓力大到逼迫個女同事行去投訴呢一步，傳到全部門都知。平時同佢合作開，都有兩句傾下。最初佢借啲意問下我邊度有相關嘅Policy參考，之後都抵唔住頸同我呻：「小熊，我唔知同唔同得你講啊，不過真係無辦法啦，遞得信我都預咗唔撈，有時唔係話做多少少唔得，係愈來愈老馮咩都叫我去跟，我就逗個雞碎咁多糧，Lunch都要覆Email，我唔要做咁嘅廉價勞工，仲要笑騎騎講到好似益我咁。一唔Like就搞我Appraisal，佢真係過到自己良心嗰關？」雖然喺HR角度唔鼓勵同事投訴，不過作為傾得兩嘴嘅只要佢諗清楚想用呢個途徑去表達意見，我係絕對唔會阻止。
其實佢都心水清，寄出投訴信之後，一定唔會有好日子過，自己亦未必承受到各種冷言冷眼，搞到佢係「不祥人」咁款，大家為自保避之則吉。結果呢，佢地「共同協議」咗約滿就拜拜，仲逼個同事要白紙黑字簽名作實呢件事，驚死佢會反口。
可能呢位上司無遇到惡劣嘅下屬，「唔聽話」只係Level 1，有啲人但求繼續出份糧，根本唔介意Appraisal咩Grading，分分鐘同你鬥長命濫用Sick leave、呃工傷，Hold住你個位無得請個人返嚟。唔好講笑，大粒佬無咗個秘書都咪話唔頭痕，再將啲工作散出去，士氣只會無止境下沉，大家或許會將矛頭指回上司當初落錯決定搞到有投訴，先有一連串影響民生嘅問題。邊個最唔著數先？除非個同事真係已經衰到貼地，咪忍到佢完約大家好來好去。你嘅氣度同事係會以多一份尊重回應。
圖：Shutterstock
以上文章刊於《招職》。
