大專男生習慣天天短褲、T恤加踢拖返學，臨近畢業要張羅見工戰衣難免無從入手。有見及此，今次特別邀得致力推動「型佬美學」教育的《佬訊》佬編，為應屆大學畢業男生見工穿搭上指點迷津。
弊在髮型
備戰見工，男生們都識得添置西裝、皮鞋，但疏忽一個髮型這項細節，就足以令形象大打折扣。佬編表示最常見的問題係，那些剛剛大學畢業的男生，他們返學時慣性Keep住蓬鬆髮型，無疑有型又富個性，但見工時髮型就不能太隨心，最好用Hair product整理一下，例如梳一個分界髮型 ( Side Part )。佬編認為分界髮型看上去整齊穩重，見工時可以予人更佳的印象，不過要留心落Hair product要適可宜止，一副濃香「油頭」走去見工只會嚇怕人。
平日出街你喜歡凌亂美也可；但見工面試，髮型最好乾淨俐落一點！
要弄一個整齊漂亮髮型，少不免要搵個可靠的髮型師幫手。不論是髮型屋或近年大熱的Barber shop，不少男生經驗係試幾間都未找到合心意的髮型師。佬編提供一個很簡單的貼士，就係先站在街邊觀察一下，看看從髮型屋或Barber shop走出來的男士，如果普遍剪完的髮型都對辦，就可以放膽一試。偏好鏟青的朋友，佬編亦建議可以先在IG搜尋一下外國知名Barber shop，搵定合心水的款式給髮型師作參考，就可以增加勝算。
西裝可以買現成 但不宜「求窄」
除了髮型，男生見工穿搭另一重頭戲係西裝。縱觀見工場合，年輕男生最常出事係西裝著上身有一陣「MK味」。佬編認為要避免此惡運其實唔難，關鍵在於追求合身而不宜「緊身」。所講「MK味」往往源於超窄身西裝，以及附有花邊等無謂裝飾的恤衫，揀一套鬆緊有致的西裝，外套不宜太短，配搭合身不花巧的恤衫，即可以掃走「MK味」。
西裝要合身，或許有男生會疑問應否投資訂造一套西裝。佬編認為只是用作見工的話，市場上現成西裝已足以應付，只緊要留心膊頭位Fitting，合身的膊位應自然貼服地沿著肩位走到手臂，覺得膊位太鬆或太緊，都應該搵裁縫微調一下剪裁。佬編亦提醒訂造靚西裝另一風險，三件頭度身訂造西裝着上身無疑有型有款，但係着得太靚太隆重，甚至靚過In你的未來上司，反而會被扣分，況且現在不少機構都毋須穿西裝返工，所以買現成西裝見工，反而是務實抉擇。
揀一套鬆緊有致的西裝，腳位不宜吊腳和太窄。(示意圖)
揀見工袋有乜避忌？
見工當然要帶齊學歷、工作證明，還可能會拎多部Laptop或iPad展示曾參與的實戰項目成果，所以揀個見工袋亦好重要。今時今日固然唔需要刻意買一個皮製公事包，然而亦未必要考慮添置裝Laptop專用的電腦背囊，佬編亦可以考慮揀一個可以裝Laptop及配置收納小格的Tote Bag，揹上身亦不會像背負方形電腦背囊般呈現「通訊兵」形象，瀟灑一點自然更有自信應付見工環節了。
揀一個可以裝Laptop、學歷及工作證明的小袋，攜帶方便又不會太累贅。
