新一年，新景象，如果返工有新動力新目標，當然值得恭喜，但如果還要面對老問題，與其唉聲嘆氣，不如積極解決。
其中一個老問題，好可能係左右做人難。
正所謂人在office，身不由己，已經係老生常談，點去明哲保身，一直係重要既課題。
記得初出茅廬，份人太天真，部門會議時，老細問我地某件事有咩可以改善既地方，自己竟然清心直講其他同事做得唔好既地方，結果比人杯葛。當時唔明自己有乜做錯，都係實話實說想做好件事，但依家睇返，自己死無全屍都真係與人無尤。
係，想做好件事，想法係正確既，但唔同身邊嘅同事商量，又係唔係適當既做法？同事可能已經諗好解決辦法同老細解釋，你竟然係呢個時候懶正義直斥其非？你自把自為嘅話，別人杯葛你，都無可厚非。
經此一役，我說話已經變得好小心，盡量只係講自己野，唔會講其他人嘅對錯。
但講到明身不由己，好多時是非對錯，你越係避，佢越係纏住你。
試過係公司A，同老細有相同嗜好，閒時傾多兩句甚至食下飯，同事就會有意無意之間防備你，怕你為左擦鞋上位咩都講比老細知；之後係公司B，試過刻意同老細保持距離，但又從同事聽到老細評價自己係一個不善溝涌嘅人。除左同老細既相處之外，同事之間分黨分派，靠邊不靠邊站，都可以有好多是非同猜忌，產生好多負能量。
咁自成一角，獨善其身又可唔可以？我亦試過孤立自己，但最後做得唔開心而辭職，原因溝通同團體合作本身係辦公室入面既重要事情，唔去融入團隊，只會處處撞板，事倍功半，無發揮，自然無癮離開。
埋堆又死，孤立自己又死？究竟點樣先可以同各部門同事甚至老細保持良好溝通之餘，又可唔洗比人唱衰話係二五仔？直至一次，我見到一個端倪。
當時，我同事同老細因為某個project有嚴重意見不合，之後就不斷咁搵我呻同埋數落對方，我夾係中間左右做人難，最慘係煩住我做唔到野，搞到我OT，但風頭火勢又唔可以叫佢地Stop，點算好？
結果，我一改唔講是非既做法，我首先將同事同老細既想法，剔除對罵嘅負能量再上去拉近距離嘅意見，再暗中幫同事老細互相交換想法，結果，佢地好快無再嘈，個project又順暢左，而我又可以再次準時收工。
經過呢次之後，唔知點解，越來越多同事鍾意搵我傾計，可能我人緣都算唔錯，又比到有用既意見，而更有趣嘅係，就算我同老細好熟關係好好，同事都無排擠同避開我，我照樣可以進入佢地既小圈子，佢地亦暢所欲言無所避忌。
有時我明知佢地係利用我把口去放風，但又如何？我唔介意，因為只要令到工作暢順，最後得益一定有自己份。
比起世界仔，我希望可以做得更多，可以去了解同化解大家既苦處，再推動事情發展。既然要活係辦公室，身處一個逃避唔到既漩渦，只要唔係立心不良，何不嚐試去控制個漩渦？
如果是非唔搵我，我唔會主動去搵是非，但如果殺到埋身，咁不如努力去明白件事，明白公司嘅需要，再減去不必要嘅負能量，傳遞去適當既地方。
我相信，只要唔係針對人，而係存心解決件事，同事及老細，都會樂意我成為一個二五仔，比起逃避，投入可能係更加明哲保身既方法。
新一年，做二五仔唔緊要，最緊要人見人愛。
