香港人成日OT全世界都知，調查發現，香港人嘅每周平均工時超過50個鐘，成為世界第一工時最長嘅城市。工時長固然係一個問題，但如果有一日你真係可以準時收工返屋企，你會唔會「放低工作」又係另一回事。好多人返到屋企都唔識得「放手放開所有」，將自己絕無僅有嘅私人時間都攪到一鑊粥，甚至影響埋生活質素同人際關係。既然香港生活咁大壓力，少少嘅私人時間變得更珍貴，收工就應該放低要放低嘅嘢。
1. 放低身份
我有個朋友個爸爸喺公司身居要職，可以話係一人之下，萬人之上。佢外形非常嚴肅，經常目無表情，見到佢你好自然就會想請個安「參見李大人」。佢喺公司經常要指揮同事做嘢，加上佢有一定威嚴，大家都忌佢三分。我朋友，即係李大人個仔經常都同我呻，佢老豆平時好少喺屋企，就算星期六、日都話要返公司做嘢，不過如果佢係屋企，簡直係佢同呀媽嘅噩夢。佢形容佢老豆為李老闆，返到屋企都仍然係一個老細，佢同佢呀媽就係佢下屬，對家人嘅態度同公司同事好似冇乜分別。有時佢對佢地可能仲嚴過下屬，冇人可以違抗佢嘅指令。
有啲人身居要職，返到屋企佢然放唔低自己嘅身分，將自己喺公司扮演緊嘅角色帶埋返屋企，直接影響埋自己同屋企人嘅關係。其實李老闆返到屋企應該做返老豆嘅角色而唔係做老細，繼我話，放咗工最好係幻想自己畀人炒咗，咁就可以放低身份做返自己。
2. 放低電話
電話好恐怖，除咗攞嚟打機嗰陣。自從有咗智能電話，你老細、同事、客人幾時都可以搵你。好多人都試過，返到屋企電話又響，Whatsapp又到，畀老細由公司追到返屋企，放工都唔係真放工。雖然受人錢財替人消災，但唔代表你應該將自己所有嘅時間貢獻出嚟。放低電話，唔好覆電郵、短訊放開所有同工作有關嘅事，做你想做嘅事，有咩叫佢留返聽日先講啦。
3. 放低情緒
巴士呀叔十幾年前一句「你有壓力，我有壓力」係香港人生活嘅寫照。喺身理上，壓力大可以令到腦部血清素減少，壓力荷爾蒙增加，增加患上焦慮症嘅風險。工作壓力容易令人脾氣變得暴躁，將壞情緒發洩喺身邊嘅人身上。最近睇美劇Supergirl，其中一集講火星人嘅念力會令人情緒暴躁，唔單止影響到地球人情緒，連氪星人都會受影響。佢地情緒爆發嘅時候會自己都唔知自己做過啲乜，到念力消失就後悔自己做過嘅嘢。壓力就好似火星人嘅念力一樣，令你自己做出一啲暴燥嘅行為，然後當你放鬆落嚟就會後悔。返到屋企，做自己喜歡嘅事有助減壓，可以係運動、打機、煲劇，總之唔好將情緒帶返屋企，影響身邊嘅人。
