世界上無完美嘅公司，只有無咁伏嘅公司；咁好嘅上司呢？似乎都係瀕臨絕種，邊個唔想跟一個又叻又夾嘅上司吖。無論你係職場小薯定已經獨當一面，只要你唔係做最大嗰個，「湊老細」基本上係無可避免，遇著極品上司，櫃桶應該長期有封辭職信ready。以下有4種唔同嘅老細，邊一種你覺得最惡頂，而邊一種你係頂緊？
第1種：工作至上
「工作」對於好多打工仔嚟講只係生活嘅一部份，但對於「人生只有工作」嘅上司並唔係咁。
明明公司officially返9點，佢8點就會返到；6點鐘收工，佢可能10點都未走；Lunch hour見你同同事hea緊，佢會走埋嚟搵你傾公事。最癲嘅係，星期六日佢會send message畀你，「提醒」你放假之後返去有咩要交。你不禁懷疑，佢究竟係咪無家庭同朋友… 甚至係咪鬼上身。
遇到呢類上司，你都唔好預自己會太得閒，如果你無project喺手，佢應該會幫你接幾多個返嚟同你充實人生，真係想同你講聲「加油」！
第2種：狂躁黑面神
出嚟做嘢，相信大家都係用「好來好去」嘅心態去同同事相處，有咩拗撬唔開心大家都唔想，不過對於呢種上司，尊重係for佢only，同其他人係無關。
可能係階級觀念問題，做得上司就好似高人一等咁，平日無咩特別就黑口黑面，有少少嘢做錯就即刻發火開炮係咁鬧，嚴重啲甚至會關注埋你身體健康（「你有無帶腦返工呀？」）同家人健康（用粗口問候你全家）添。
如果心靈比較脆弱，勸你都係盡早Click左上角CPjobs icon，再search下有咩工啱自己好過，一陣頂唔到隨時有情緒病。
第3種：職場派路
如果有睇開波嘅打工仔，應該認識一個被稱為「球場藝術家」嘅中場球員派路（Andrea Pirlo），呢位咁出名嘅足球員最叻就係「派牌」，一接到波，佢就會快、狠、準咁將個波交畀前場嘅隊友發動進攻。睇到呢度你係咪覺得：「咦？咁唔係咁差啫～」
呢種上司一接到新project，佢就會即刻「派」畀下屬，叫你自己睇自己搞掂，除咗幾時交之外，你唔會得到任何資訊，你想問佢意見咩？佢又會問返你覺得自己邊度有問題，原來到頭來係自己問返自己…
一開始你可能會覺得上司畀好多機會你上位，但慢慢你會發現佢純粹係將工作卸畀下屬，當然，出現問題都係你做得唔好，同上司一啲關係都無啦。
第4種：領功大使
一個好嘅上司，除咗會教你做事，幫你成長，仲會畀機會你表現自己，讓老闆都認識下你，等條Team可以發大嚟搞，不過呢個係理想嘅畫面。實際又係點？有種上司係最鍾意你任勞任怨，有橋叫你度，有project叫你跟，有OT一定預埋你，但同老細present就100%無你份，當然論功行賞亦唔到你，因為佢已經領咗功。
如果你係一個比較aggressive嘅人，而你上司係上面嗰一種，咁你搵定工都得，因為佢一定唔會鍾意你。
睇到呢度，如果你覺得呢啲似電影橋段，覺得誇張又無發生喺自己身上，我會話：「我真係恭喜你呀！」。但如果有邊一個畫面令你覺得親歷奇境，令你開始面紅耳赤，手心冒汗，心跳加速，不如考慮下轉工，順便轉埋個上司啦。
